د تاریخ په اوږدو کې، هر اشغالګر او متجاوز چې افغانستان ته یې د یرغل په سترګه کتلي، یوازینۍ موخه یې له دې خاورې څخه اقتصادي، سیاسي او سیمهییزه ګټه پورته کول وو. له همدې امله تل د دوی نقشه او پلان دا و چې افغانستان د نړۍ له کاروان څخه شاته پاتې شي، که څه هم په هره بیه تمام شي او هر څومره خلک ووژل شي.
خو د دښمن د لوی ځواک او نظامي برلاسۍ سره، سره د افغانستان شریف ملت وتوانېده چې له ډېرو زړورو هڅو او مبارزو وروسته دا هېواد د اشغالګرو او تېريکوونکو له غلامۍ او اسارت څخه آزاد کړي. اوس افغانستان له څه مودې راهیسې د خپلواکۍ تر بیرغ لاندې ژوند کوي او د هر اشغالګر له بنده خلاص شوی دی.
باید پوه شو چې اشغالګر یا کفري هېوادونه هېڅکله نه غواړي چې اسلامي هېوادونه آزاد او خپلواک ژوند وکړي او خپل برخلیک په خپله وټاکي، بلکې په هره لاره چې ممکن وي غواړي چې هغه هېوادونه تر خپلې ولکې او واکمنۍ لاندې ولري او د پردې تر شا واکمنان او اصلي حاکمان یې پخپله وي.
خو هغه څه چې ښکاره حقیقت دی، هغه دا دی چې د افغانستان غیور ملت د تاریخ په اوږدو کې د لویو امپراتوریو او قدرتونو په ماتولو سره تل دا ثابته کړې چې د آزادۍ او خپلواکۍ حق د دوی دی او هېڅوک نه شي کولای په زور او فشار سره دوی تسلیم کړي.
د اشغال د دورې له پای ته رسېدو او له دښمنانو سره د جګړې له ختمېدو وروسته، اوس د دې فرصت رارسېدلی چې دا هېواد د آزادۍ اصلي خوند وڅکي او په نړۍ کې ازادانه تعامل وکړي. په دې منځ کې، له نړۍ سره د تعامل د لارو د پرانیستلو لپاره د نړۍ د هېوادونو له خوا د دې هېواد په رسمیت پېژندل اړین او لازمي دي.
نو د افغانستان له خپلواکۍ او د مغرورې امریکا په څېر د اشغالګرو له شړلو او ایستلو څخه شاوخوا څلور کاله وروسته، روسیه لومړنی هېواد دی چې په رسمي توګه یې دا هېواد په رسمیت وپېژنده او د هېواد بیرغ په روسیه کې د افغانستان په سفارت کې ورپول شو او د نړۍ په افق کې د افغان ملت لپاره د هیلې یوه کړکۍ پرانیستل شوه.
دا منل، لومړنی او تر ټولو مهم ګام دی چې اخیستل شوی او له دې وروسته به نور ډېر هېوادونه هم د وخت په تېرېدو سره دا هېواد په رسمیت وپېژني او دا طلسم به مات شي. همدارنګه د روسیې له خوا په رسمیت پېژندل له نورو هېوادونو سره د افغانستان په سیاسي تعاملاتو کې د سولې، پخلاینې او پرمختګ پیغامراوړونکی او د سرپرست حکومت لپاره د بریا او کامیابي ښکارندوی دی.
هغه حکومت چې د خلکو له منځه راپورته شوی او له ملت او هېواد ته له خدمت پرته بله موخه نه لري او د وخت په تېرېدو سره هره ورځ د ملت او د نړۍ د ملتونو ډېر باور او اطمنان ترلاسه کوي، معلومه ده چې ښه پایله یې په تمه ده او پرمختګ به یې په رسمیت پېژندلو سره د نړۍ په هنداره کې څرګند شي.
په دې منځ کې، د مخالفینو غمجن غږونه پورته شوي او هر یوه له هر تریبون څخه د روسیې دا اقدام او پرېکړه غندلې ده. له هغه ځایه چې تمه یې نه درلوده نو ځکه داسې ښکاري چې یو کلک او ځپونکی ګوزار یې خوړلی او دا ډول پرېکړه د دوی د ژورې ناهیلۍ لپاره خورا اغېزناکه وه.
د افغانستان د ملت د دې بریا پر وړاندې په خپلو غبرګونونو سره، دوی یو ځل بیا خپله اصلي او کرغېړنه څهره بربنډه کړه او ویې ښودله چې هېڅکله د افغانستان د پرمختګ او د ملت د ژوند د ښه والي غوښتونکي نه دي او لا هم هڅه کوي هر هغه اقدام چې د دې هېواد د ښه والي لپاره اخیستل کېږي، ګډوډ او خراب وښیي.
داسې څرګندوي لکه یواځې چې دوی د دې هېواد او خلکو په خیر او صلاح پوهېدل او په هغه ټولو ورانیو، ویجاړیو، اختلاس او زور زیاتي سره چې د جمهوریت او اشغال په دوره کې یې پر دې ملت تپلي وو، لا هم فکر کوي چې هماغه دوره د ملت په ګټه او صلاح وه!
خو د افغانستان شریف ملت دې درک او شعور ته رسېدلی چې نور د دوی چل رنګ نه لري، د دوی له مشکو څخه د تعفن بوی راځي او د دوی د فریب رسۍ شړېدلې ده.
نو هر څومره چې لوړې چیغې ووهي او له لیرې او نږدې یې وغندي، ګټه نه لري، د وخت په تېرېدو سره به بالاخره په خپلې ماتې پوه شي او د تل لپاره به پر شونډو د چوپتیا مهر ولګوي او نور به له دوی څخه داسې غږ وا نهورېدل شي چې وغواړي درواغ د حقیقت پر ځای او تزویر د صداقت پر ځای پر خلکو وپلوري.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.