د سوریې د کورنیو چارو وزارت اعلان کړی، چې امنیتي ځواکونو د بشار الاسد د پرځېدلي رژیم یو پخوانی ډګروال، احمد حبیب علي، نیولی دی. وزارت نوموړی د کیمیاوي وسلو متخصص او د اسد د رژیم د پټو کیمیاوي وسلو د پروګرام له مهمو مسوولینو څخه بولي.
د وزارت په وینا، احمد حبیب علي د ساینسي مطالعاتو او څېړنیز مرکز د ۴۱۷م واحد مسؤول و او د سارین ګازو د زېرمو او کیمیاوي وسلو د تولید چارې یې څارلې. لومړنۍ څېړنې ښيي، چې هغه د شاوخوا ۲۰ بمونو د تولید څارنه کړې وه، چې هر یو یې ۲۵۰ کیلوګرامه سارین ګاز لېږداوه او د ۲۰۱۳ او ۲۰۱۷ کلونو ترمنځ د سوریې پر ښارونو او ښارګوټو په بریدونو کې کارول شوي وو.
د سوریې د کورنیو چارو وزارت ویلي، چې د نوموړي د نورو احتمالي جرمونو د مستندسازۍ او بشپړو څېړنو بهیر دوام لري او له بشپړېدو وروسته به یې قضیه عدلي او قضايي ارګانونو ته وسپارل شي.