د ازموینو ملي ادارې نن د ۱۴۰۳ل کال د کانکور ازموینې پایلې اعلان کړې، چې د هېواد په کچه اتل خان رحیمزوی تر ټولو ډېرې نمرې اخیستې دي.
د یادې ادارې چارسمبالي رئیس عبدالباقي حقاني وویل، سږکال کانکور ازموینه کې ۴۱زره ۲۹۳ تنه لوړو زده کړو ته، ۲زره او ۱۴۴ تنه نیمه لوړو زده کړو ته او ۱۳۰۱ تنه هم دیني مدرسو ته بریالي شوي دي.
ده وویل، دغه ازموینه کې ۱۷ زره او ۷۲۱ تنه بې پایلې پاتې، ۲۴ زره او ۳۹ تنه واجد شرایط او ۱۷ او ۷۶۰ تنه یې دویم ظرفیت ته ځانگړي کړي دي.
نوموړي زیاته کړه، اتل رحیمزوی د سږکال کانکور عمومي اول نمره شوی، چې ۳۵۹ اعشاریه ۶۱ نمرو په تر لاسه کولو یې لومړی مقام گټلی دی. همدارنگه زین الله یوسفي په ۳۱۵ نمبو اخیستلو سره د دیني مدرسو په ازموینه کې لومړی مقام گټلی دی.
د ښاغلي حقاني په خبره، سید حامد هاشمي د سید محمد اغا زوی د بلخ ولایت اوسېدونکی د ۱۴۰۳ کال کانکور ازموینې عمومي دویم نمره شوی. نوموړي د ۳۵۷.۷۱ نمرو په تر لاسه کولو سره د کابل طب پوهنځي ته لاره موندلې.
همدا ډول شفیعالله نظامي د احمد جاوېد زوی د فراه ولایت اوسېدونکی د ۱۴۰۳ کال کانکور ازموینې عمومي دریېم نمره شوی. نوموړي د ۳۵۷.۲۵ نمرو په تر لاسه کولو سره د هرات طب پوهنځي ته بریالی شوی دی.
د کانکور د پایلو په اعلان کې د لوړو زدهکړو چارسمبالي وزیر ندا محمد ندیم وویل، د کانکور په ازموینه کې بریالیو ځوانانو ته ډاډ ورکوم چې د لوړو زده کړو وزارت په علمي ډگر کې ستاسو د پرمختگ لپاره ډېر څه چمتو کړي دي.: «د خوښۍ ځای دی چې د پرمختگونو په دوام، د یوه داسې پرمختگ شاهدان یو چې د افغانستان د روښانه راتلونکي زېری له ځان سره لري.»
د ریاست الوزراء اداري مرستیال عبدالسلام حنفي وویل، هغو ځوانانو چې پرو سږکال شپه او ورځ په ځان یوه کړې وه، درسونه یې ویلي او زیار یې گاللی، نن به خامخا ښې پایلې تر لاسه کړي.
هغه ځوانان دې هم نه نهیلي کېږي چې ښې پایلې نه دي تر لاسه کړي، بلکې د راتلونکي کانکور لپاره دې ښه چمتووالي ونیسي ان شاء الله چې ښې پایلې به تر لاسه کړي.: «د افغانستان د ابادۍ او پرمختگ لپاره موږ په هره برخه کې مسلکي او مجربو ځوانانو ته اړتیا لرو. ازموینه د پټو استعدادونو او وړتیاوو د ښکاره کولو لپاره یوه مهمه وسیله ده. زه په دې پروسه کې د بریالیو کسانو، د هغوی کورنیو او ټول ملت ته د زړه له کومي مبارکي وایم او په راتلونکي کې ورته د زیاتو بریاوو هیله کوم.»
د یادونې وړ ده، چې سږني کانکور ازموینه کې څه باندې ۱۰۰ زرو زدهکوونکو گډون کړی وو، چې ۴۱زره ۲۹۳ تنه لوړو زده کړو ته، ۲زره او ۱۴۴ تنه نیمه لوړو زده کړو ته او ۱۳۰۱ تنه هم دیني مدرسو ته بریالي شوي دي.