د افغانستان د عدلیې وزارت ویلي، چې د شرطې قانون د افغان حکومت د مشرتابه له توشېح وروسته د ۱۴۴۸ هـ.ق کال د صفرالمظفر میاشتې په ۵مه نېټه په ۱۴۹۶ ګڼه رسمي جریده کې خپور شوی دی.
د وزارت د معلوماتو له مخې، دغه قانون یوه مقدمه، دوه بابونه، پنځه فصلونه او ۵۳ مادې لري، چې د تطبیق مرجع یې د کورنیو چارو وزارت ټاکل شوې ده.
په دې قانون کې د شرطې دندو او مسوولیتونو ته حقوقي چوکاټ برابر شوی، چې پکې د امنیت ساتنې، سرحدونو د امنیت، عبور او مرور، د بندیانو چارو، د نشهیي توکو، اختطاف او انساني قاچاق د مخنیوي او نورو برخو کې د شرطې مسوولیتونه مشخص شوي دي.
همداراز، په قانون کې د هویت تثبیت، د مجرمینو نیول، جلب او احضار، تلاشي او د شرطې د اقداماتو او صلاحیتونو حدود هم روښانه شوي دي.