د جمهوریت د پرځېدو څه باندې درې کاله په پوره کېدو دي، په تېرو دريو کلنو کې د طالبانو ضد ډلو او بېلابيلو پخوانیو چارواکو وخت نا وخت د اعلامیو او رسنیزو کمپاینونو پر مهال په افغانستان کې د وسلوالو ډلو (لکه القاعده، ټي ټي پي، نورو اسلامي غورځنګونو او ځینو نیابتي ډلو) د شتون ادعاوې کړې دي.
د شر او فساد ډلې نه تنها دا چې په هېواد کې له طالبانو سره د عناد او عقدې پاللو په موخه په افغانستان کې د بهرنيو وسلوالو ډلو د شتون ادعاوې کوي، بلکې که د افغانستان په ګاونډيو، سیمه ییزو او لرې هېوادونو کې هم يوه چاودنه کېږي، نو دوی د خپلو بادارانو د تېر ایستلو په موخه، په خپلو تحليلونو او له غندنو ډکو اعلاميو کې د برید اصلي رهبري کوونکی مرکز د طالبانو تر کنټرول لاندې افغانستان ښیي.
څه موده وړاندې د روسیې په مسکو کې، پر کراکوس کنسرټ د څو تنو وسلوالو لخوا برید وشو، چې په پایله کې یې لسګونه روسي وګړي ووژل شول او تر لسګونه ډېر يې زخمیان کړل؛ د شر او فساد ډلو له روسیې سره د خواخوږۍ په اعلامیو کې، د دغه برید ريښه او سرچينه افغانستان ته منسوبول، دوی هڅه کول چې د روسیې او افغانستان د اړیکو خرابولو تر څنګ، دوی ته په افغانستان کې د سرپرست حکومت د نسکورولو روحیه ورکړي او دغه شریر عناصر واک ته ورسوي، خو د ترسره شويو څېړنو په پايله کې ثابته شوه چې بریدګر تاجکستاني وګړي وو او له افغانستان سره یې تړاو نه درلود.
د طالبانو خلاف جنګېدونکو ټولو جريانونو چې په مخامخ جګړه کې یې ماتې خوړلې ده، په سیاسي او تبلیغاتي کچه یې هم د نه وحدت له امله ماتې خوړلې ده، له دې برسېره بیا هم ټوله هڅه دا کوي، چې د طالبانو حکومت نړۍ ته د هغه وسلوالو ډلو یا جریانونو په ساتلو او د خوندي پټنځايونو په ورکونکو معرفي کړي، کوم چې په سیمه او نړۍ کې برحاله په جګړه بوخت دي.
د شر او فساد عاملین بيا د ۲۰۰۱م کلونو خوب او خیال ويني، چې د امريکا نوی حکومت به د دوی په دې تبلیغاتو سره پر افغانستان يرغل وکړي او دوی به په زور پر افغان ولس بيا واکمنان کړي. دوی تمه لري چې بيا به یې زبرځواک اشغالګر په افغانستان کې د قدرت جزیرو، اداري فساد او د بادارانو د موخو تحقق لپاره د تېرو دوه لسیزو په ډول واک ته ورسوي.
د شر او فساد عاملین د ولس د سوکالۍ، د هېواد په پرمختګ او نورو برخو کې له سيالانو سره د سيالۍ هيڅ تمه او پلان نه لري، بلکې دوی د دې په لټه کې دي، چې په هره ممکنه لار واک ترلاسه کړي، ولو که په هغه لار کې ميليونونه افغانان شهیدان، کډوال او معیوب هم شي، هيڅ پروا نه لري. دا واک که په هره معامله کېږي، هم یې کوي؛ هغه که د ډيورنډ فرضي کرښې په پلورلو وي، که افغانستان نړۍ ته د وسلوالو ډلو د خوندي پټنځای په معرفي کولو او بل هر څه وي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.