د رياست الوزراء اقتصادي معاونيت په يوه خبرپاڼه کې وايي، چې د جوزجان ولایت د طوطي میدان د ګازو د اکتشاف او استخراج چارې چې له ازبکستاني شرکت سره یې قرارداد شوی، پیل شوې.
په همدې مناسبت غونډې ته د رياست الوزراء اقتصادي مرستيال ملا عبدالغني برادر ويلي، چې په دې سره به زیات شمېر هېوادوالو ته کاري فرصتونه برابر، په کور دننه به د ګازو اړتیا تر ډېره حده پوره، په وارداتي ګازو او برښنا به د هېواد تکیه راکمه او په تدریجي توګه به بهر ته د ګازو د صادرولو زمینه مساعده شي.
سرچينه وايي، د کانونو او پټرولیم وزیر ملا هدایتالله بدري په مزارشریف کې په دې اړه جوړو شویو مراسمو کې ويلي، چې د دې پروژې په عملي کېدو سره به د لومړیو دوه کلونو په ترڅ کې ۱۰۰ میګاواټه برښنا تولید شي.
د نوموړي په وینا، د ۲۵ کلونو په اعتبار لرونکي دغه قرارداد له مخې به یوازې په لومړیو لسو کلونو کې نږدې یو میلیارد ډالره پانګونه وشي.
ښاغلي بدري زیاته کړې، چې د طوطي میدان د ګازو ساحه شاوخوا ۷ زره کیلومتره مربع مساحت لري او د استخراج لپاره به پکې ۳۰ څاګانې وکیندل شي.