د عزيزي ګروپ مشر او ملي پانګوال ميرويس عزيزي د عزيزي ګروپ او اوبو او انرژۍ وزارت ترمنځ د لس ميليارده ډالرو په ارزښت د لس زره ميګاواټه برېښنا د تولید پروژې د تړون لاسليکولو مراسمو ته ويلي، چې ياده پروژه به له ښارونو تر کلیو ټولو افغانانو ته کاري فرصتونه رامنځته کړي.
نوموړي زياته کړې، چې د انرژۍ له تولید سره به په هېواد کې زیات کاري فرصتونه پیدا او ځوانان به اړ نه وي چې بهرنيو هېوادونو ته لاړ شي.
عزيزي زياته کړې، د هېواد د پرمختګ لپاره انرژي تر ټولو مهم او بنسټيز عنصر دی او په خبره یې افغانستان د طبيعي سرچینو له پلوه خورا غني هېواد دی، خو کار ته اړتیا لري.
نوموړی زياتوي، چې ياده پروژه داسې پلان شوې، چې تر ٢٠٣٢م کال پورې به له سولر سيسټم، اوبو، زغالو، بادي سيسټم او ګاز څخه ١٠٠٠٠ میګاواټه برېښنا تولید کړي.
عزيزي زياتوي، چې موږ ټاپي پروژې ته نه ماتل کېږو، ځکه هغه وخت نیونکې پروژه ده او په وينا یې موږ اقدام کوو او په هرات کې ٨٠٠ مېګاواټه برېښنا تولید پیلوو.
نوموړي زياته کړې، چې له باد څخه د ٧٠٠ میګاواټه او له اوبو څخه د ٢٠٠٠ مېګاواټه برېښنا د تولید پلان لرو.