د لوړو زدهکړو وزارت وايي، د دغه وزارت او ملي پراختیا شرکت ترمنځ د دوه اړخیزو همکاریو هوکړهلیک لاسلیک شوی دی.
له یاد وزارت څخه په خپره شوې خبرپاڼه کې ویل شوي، د دغې هوکړې له مخې په سترو ملي پروژو کې د استادانو له ظرفیتونو گټه اخیستنه، محصلینو ته د ملي پراختیا شرکت په پروژو کې د عملي کارونو زمینه برابرول او د پایلیکونو پروژو تکمیلول، د لوړو زده کړو وزارت له لوري د ملي پراختیا شرکت کارکوونکو ته د ماسټري او دوکتورا برنامو زمینه برابرول، علمي څېړنیزو کنفرانسونو ته د ملي پراختیا شرکت کارکوونکو رادعوتول، دواړه لوري یو د بل له کادرونو، متخصصینو او امکاناتو څخه گټه اخیسته او دې ورته نور موارد شامل دي.
په خبرپاڼه کې د لوړو زدهکړو د چارسمبالي وزیر نداء محمد ندیم له قوله ویل شوي، چې د دې هوکړې پر بنسټ نظر او عمل سره یو ځای کېږي او په گډه به د افغانستان د پرمختگ لپاره کار کوي.: «زموږ د دنیا او اخيرت پرمختگ او بریا له یو بل سره په مرسته او همکارۍ کې ده او دا د بشریت اړتیا ده.»
نوموړي ویلي، د دې هوکړه ليک له لاسليک سره به د لوړو زدهکړو وزارت د زدهکړیالانو د عملي کار د ستونزو يوه لويه برخه حل شي. هغه اسانتیاوې، چې ملي پراختیا شرکت لري. که مو ږ یې زدهکړیالانو، استادانو او لوړو زدهکړو ته برابرې کړو، نو مېلیونونو ډالر بوديجې ته به اړتیا ولرو. ملي پراختیا شرکت ته به کارکوونکي او مسلکي کسان برابر کړي، چې په بېلابېلو څانگو کې ترې کار واخیستل شي.
د ملي پراختیا شرکت د سوداگرۍ او پانگونې رئیس فضیل فیضان ویلي، هغه محصلان چې د لېسانس او ماسټرۍ دورې بشپړوي، د اړتیا له مخې ملي پراختیا شرکت ته ورپېژندل کېږي او د دې شرکت په څېړنیزو پروژو کې به کار کوي.
د یادونې وړ ده، د قوشتېپې کانال د ملي پراختيا شرکت تر ټولو ستره پروژه ده، چې اوسمهال يې چارې په چټکۍ روانې دي. دا شرکت اوس هم د کانونو، انرژۍ د تولید، صنعت، کرنې او ترانسپورت په برخو کې د سترو کارونو د کولو اراده لري.