د بهرنيو چارو وزارت وياند عبدالقهار بلخي د قرغزستان له لوري د ممنوعه ډلو له لېست څخه د اسلامي امارت نوم د وېستلو خبر ورکړی او په دې اړه څرګندونو کې د قرغزستان ياد ګام د ستاينې او هرکلي وړ بولي.
ښاغلی بلخي د قرغزستان هېواد ياد ګام ته په څرګندونو کې وايي: د افغانستان اسلامي امارت د بهرنيو چارو وزارت، د قرغزستان جمهوريت لخوا د طالبانو غورځنګ نوم چې، پخوا د افغانستان اسلامي امارت ته نسبت ورکول کېده د ممنوعه ډلو له لېست څخه لرې کول د ستاينې وړ ګام بولي او هرکلی یې کوي.
همدارنګه ښاغلی بلخي په يادو څرګندونو کې د نورو هېوادونو په تسلسل، د قرغزستان دا ګام په سيمه او نړۍ کې د اسلامي امارت په تړاو د سياسي درک د رامنځته کېدو ښکارندوی بولي.
او په وينا يې ياد ګام د اسلامي امارت او نورو هېوادونو ترمنځ د دوه اړخيزو اړيکو د لا پياوړتيا په لار کې د خنډ د لرې کېدو په معنا ده.
قرغزستان ياد ګام په داسې حال کې اخلي چې څو ورځې وړاندې د بهرنيو چارو وزير مولوي اميرخان متقي استانبول کې د افغانستان سفارت کارکوونکو ته په خپلو خبرو کې په نژدې ورځو کې د مهمو ډيپلوماتيکو پرمختګونو خبر ورکړی وو.