د افغانستان لپاره د هندوستان ځانگړي استازي جيپي سنگهـ په کابل کې د افغانستان د بهرنیو چارو د چارسمبالي وزیر مولوي امیرخان متقي سربېره له گڼو چارواکو سره لیدلي دي.
د بهرنیو چارو وزارت څخه په خپره شوې خبرپاڼه کې ویل شوي، د بهرنیو چارو وزیر د هند له استازي سره د افغانستان او هندوستان پر دوو اړخیزو اړیکو، اقتصادي او ترانزیتي مسئایلو هر اړخیزې خبرې کړې دي.
په خبرپاڼه کې د جيپي سنگهـ له قوله ویل شوي، هندوستان په تېرو شاوخوا دوه نیمو کلونو کې له افغانستان سره په جلا جلا برخو کې بشرې مرستې کړې او د اوسني افغان حکومت له لوري بشپړ امنیت، ثبات، له نشهيي توکو، داعش او فساد سره مبارزه یې مهمې لاستهراوړنې بللې دي.:«هند لېواله دی په سیاسي او اقتصادي برخو کې له افغانستان سره اړیکې پراخه کړي او د چابهار بندر له لارې سوداگرۍ ته وده ورکړي.»
د افغانستان د بهرنیو چارو وزیر ویلي، اسلامي امارت د خپل متوازن بهرني سیاست له مخې غواړي چې د سیمې د یو مهم هېواد په توگه له هندوستان سره سیاسي او اقتصادي اړیکې پیاوړې کړي.
ښاغلي متقي د هند له استازي د افغان سوداگرو، ناروغانو او محصلانو اړوند د وېزو د اسانتیاوو غوښتنه کړې ده.
د یو بل خبر له مخې، د هندوستان ځانگړي استازي په کابل کې له گڼ شمېر سوداگرو سره هم لیدلي دي او د افغانستان او هندوستان ترمنځ پر اقتصادي، ترانزیتي او د افغان سوداگرو د وېزو په مسئایلو یې ورسره خبرې کړې دي.
په دغه لیدنه کې د هند استازي ژمنه کړې، چې د افغان سوداگرو مسئایلو ته به جدي پام کېږي او د شته ستونزو په هواري کې به له افغان لوري سره مرسته کوي.
که څه هم افغانستان او هندوستان تر اوسه د سفارت تر کچې اړیکې نه لري، خو تمه شته چې په کابل کې به ډېر ژر د هندوستان سفارت بیا پرانیستل شي او هم به په نوي ډیلي کې د افغانستان تړل شوی سفارت بېرته خپلې چارې پیل کړي.