د ټرانسپورټ او هوایي چلند وزارت د هوا پېژندنې ادارې د یوې خبر پاڼې په خپرولو سره د هېواد په ۲۲ ولایتونو کې د سختو اورښتونو، بادونو او سېلابونو راوتلو اټکل کړی دی.
په خبر پاڼه کې ویل شوي، چې نن چهارشنبه په هرات، فراه، غور، بادغیس، سرپل، بامیان، سمنگان، بلخ، کندوز، بغلان، تخار، بدخشان، نورستان، کونړ، لغمان، ننگرهار، پنجشیر، کاپیسا، پروان، وردگ، غزني او لوگر ولایتونو کې د شدید باران، تالندې، توپانونو او سېلابونو د راوتلو امکان شته دی.
د هوا پېژندنې ادارې د اټکلونو له مخې، د اورښت کچه به په بېلابېلو سیمو کې له ۱۵ څخه تر ۲۵ ملي مترو پورې وي.
دغه اداره زیاتوي، په شمالي او شمال لویدیځو ولایتونو کې د توندو بادونو د سرعت کچه په بېلابېلو سیمو کې له ۳۰ څخه تر ۶۰ کیلو مترو پورې ساعت کې اټکل شوی دی.
یاده دې وي، چې له دې وړاندې هم د هېواد په بیلابېلو ولایتونو کې د سختو اورښتونو له امله سیلابونه راوتلي و، چې د بغلان او یو شمېر نورو ولایتونو کې یې ګڼ مالي او ځاني زیانونه واړول.