له تېرې اوونۍ راهیسې د هېواد په گڼو ولایتونو کې واورې او ورښتونه ورېږي، چې په ځینو سیمو کې یې ځايي خلکو ته ځاني او مالي تلفات هم اړولي دي.
که څه هم افغان حکومت تر اوسه د وروستیو واورو او ورښتونو کې د اوښتې مرگژوبلې په اړه کره شمېره رسنیزه کړې نه ده؛ خو د ځینو رسنیو د راپورونو پر بنسټ د هېواد په بېلابېلو ولایتونو کې ۱۵ تنه مړه شوي او ۳۰ تنه ژوبل شوي دي.
د وروستیو ورښتونو او واورې له امله د سالنگ لویې لارې په گډون د غور، بادغیس، بامیان، هرات او غزني د تگ راتگ لارې تړل شوې دي.
د هېواد په گوټ ـ گوټ کې لا هم واورې او ورښتونه ورېږي او روانه اوونۍ هم د کابل په گډون گڼو ولایتونو کې د واورې او ورښتونو اټکل شوی دی.په شمالي او مرکزي ولایتونو کې بیا سخته واوره شوې ده، چې گڼ څاروي یې هم تلف کړي دي.
د کرنې، اوبولگولو او مالدارۍ وزارت وايي، د بېلابېلو وزارتونو گډه کمېټه جوړه شوې او ځینو ولایتونو ته یې د څارویو لپاره خوراکي توکي وړي دي.:«رئیس الوزراء په لومړي گام کې د مالدارانو څارویو لپاره په بېړنۍ توگه د اړتیا وړ وښو د برابرولو په موخه کمېټه جوړه کړې او ۵۰ مېلیونه افغانۍ یې ورسپارلې دي؛ تر څو په بېړنۍ توگه څارویو ته د اړتیا وړ واښه برابر کړي.»
که څه هم په سږني ژمي کې د نورو کلونو په پرتله واورې او ورښتونه کم وو؛ خو له تېرې اوونۍ راهیسې د هېواد گڼ ولایتونه د واورې او ورښتونو شاهدان دي.
د ملي دفاع وزارت په گڼو ولایتونو کې له خلکو غوښتي، چې د اړتیا پر مهال د هېواد هوايي ځواک خبر کړي او هغه خلک به وژغوري چې د سېلابونو په منځ کې بند پاتې وي.