په ویانا کې د سرپرست حکومت د څو مخالفینو دوه ورځنۍ فرمایشي او نمایشي ناسته د یوې مبهمې، مجملې او د ناستې د تمویلوونکو په فرمایشي اعلامیې پای ته ورسېده. دې ناستې ته له اوږدې مودې راهیسې د څو مخالفو ډلو ټپلو، د هغوی د تمویلوونکو او ملاتړو له خوا په ټولنیزو رسنیو کې پراخ کمپاینونه روان وو. د دې ناستې اصلي موخه دا وه، چې په بهر کې جوړې شوې ډلې او جبهې پکې راټولې کړي، هغوی وهڅوي چې خپلمنځي اختلافات پای ته ورسوي او یوې هوکړې ته سره ورسېږي.
خو تر څلورو پرله پسې دغه ډول ناستو وروسته، ان په پنځمه دوره کې هم دوی په دې ونه توانېدل چې حتی هغه کسان سره راټول کړي، چې یو وخت د یوې جالې سپاره وو، بلکې که د دې لړۍ تېرو ناستو ته وکتل شي، ان هغه تېرې څهرې هم نه پکې ښکارېدې، چې دا په خپله د نویو درزونو، ټکرونو او شدیدو اختلافاتو څرګندونه کوي. له بلې خوا تر دې ناستې مخکې د مخالفو ډلو ځینو غړو، پلویانو او تمویلوونکو داسې انګېرله او دومره خوشبینه وو چې ګواکې په دې ناسته کې به جادو وشي او هرڅه به ورسره شي.
خو دې ناستې وښوده، چې د دغو مخالفو ډلو ترمنځ شته ټکرونه، درزونه، اختلافونه او بدبینۍ تر هغې ډېرې دي چې څومره پرې بیرون تبصرې کېږي. بله مهمه مسئله دا ده، چې په دوی باندې داسې ګونګه، مبهمه او مجمله اعلامیه خپره شوې، چې هره ماده یې د وضاحت په موخه لسګونو نورو مادو ته اړتیا لري، چې دا په خپله د شدید اختلاف، تحمیل شویو، تپل شویو مسایلو، تحمیل شویو، نمایشي او فرمایشي مسایلو ښکارندويي کوي.
نو د ویانا دا ناسته او اعلامیه یې د تېرو څلورو ناکامو او بې پایلو ناستو لړۍ ده، چې ښايي په خپله ګډونوالو او نورو مخالفو ډلو ته به جدي عواقب ولري. اعلامیې او ابهاماتو او له نورو جریانونو او ډلو سره د ټکر ټکو ته په پام به د دوی ټکرونه لا شدید کړي او دغه راز به یې تمویلوونکو او ډونرانو ته هم دا څرګنده کړي، چې په دغو پرزو او افرادو پانګونه بې ځایه، بې ګټه او هسې د وخت او امکاناتو ضیاع ده، که څه هم دوی یو ځل مخکې ازمویل شوي وو، خو بیا هم چانس ورکړل شو او تر ډېره داسې ښکاري چې دا ازموینه به یې وروستۍ ازموینه شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.