د افغانستان او پاکستان د سوداګري او صنایعو ګډې خونې د یوې خبرپاڼې په خپرولو سره، خبرداری ورکړی، که د پاکستان انحصاري سیاستونه دوام وکړي نو د ۲.۷۶ میلیارد ډالرو په ارزښت به د افغانستان بازار له لاسه ورکړي.
د یادې خونې رهبرۍ د پاکستاني حکومت پر سیاستونو نیوکې کړي او خبرداری یې ورکړی چې د دغو سیاستونو دوام به د افغانستان ټوله سوداګري چابهار بندر ته انتقال کړي.
د دغې خونې له لوري په خپره شوې خبرپاڼه کې راغلي، د افغانستان ټرانزیټي سوداګرۍ په اړه وروستيو محدودیتونو دوه اړخیزه سوداګري ۸۰ سلنه راکمه کړې ده.
د افغانستان او پاکستان ترمنځ د سوداګرۍ لپاره د لازمو سهولتونو د رامنځته کولو لپاره له تکرار ناستو، خبرو اترو او د پاکستاني چارواکو له پرلهپسې ژمنو سره لا هم د افغان سوداګرو لپاره ګڼ شمېر ستونزې په مخ پراته دي.
بل خوا د افغان حکومت د اقتصاد محوره بهرني سیاست په پایله کې له ګاونډیو هېوادونو سربېره د سیمې او نړۍ له نورو هېوادونو سره د ځمکې او هوا له لارې افغان سوداګرو ته د سوداګرۍ زمینه برابره شوې چې ورسره د افغان سوداګرو تکیا د پاکستان پر سوداګریزو بندرونو خورا کمه شوې ده.