څو ورځې وړاندې په پکتیکا ولایت کې د پاکستاني الوتکو بمونو د بېګناه ښځو او ماشومانو خواږه خوبونه ګډوډ او د ژمي یخه شپه یې یو ځل بیا ویر لړلې کړه.
په دې بریدونو کې چې د پاکستاني پوځ ډار او بزدلي یې نړۍ ته برملا کړه، له ۴۰ زیات بې ګناه انسانان شهیدان شول، په داسې حال کې چې ډېره برخه یې ښځې او ماشومان وو. یاد بریدونه د هغو هېوادونو او نړیوالو ادارو چې لږ انساني احساس هم ورسره و، له سختو غبرګونونو او غندنو سره مخ شول.
په دې منځ کې یو څه چې د افغانستان د ملت پام یې ځان ته واړاوه، د هغو کسانو غبرګونونه او څرګندونې وې چې واک ته د طالبانو له رسېدو وروسته تښتېدلي دي، له هېواد څخه د باندې د خپلو غربي او شرقي بادارانو په غېږه کې د اوسني نظام په وړاندې د بغاوت شعارونه ورکوي او ځانونه د دې خاورې او خلکو خواخوږي بولي.
د شر او فساد ډلې لارویانو په پکتیکا کې دا وحشتناک جنایتونه نه یوازې دا چې ویې نه غندل، بلکې له ملنډو د ډکو متنونو په خپرولو سره یې له پاکستان څخه مننه وکړه او په ځینو برخو کې یې پاکستان د ورته جنایتونو تکرار ته هم وهڅاوه.
د پاکستان د بریدونو په اړه د دوی دا ډول غبرګونونو یو ځل بیا د دوی تور مخونه را بربنډ کړل او ټولو ته یې ښکاره کړه، چې دا کینه کښ خلک د خپلو ګټو د خوندي کولو لپاره نه یوازې له افغانیت بلکې له اسلامیت او انسانيت څخه هم لوړ ځي او ټولې سرې کرښې تر پښو لاندې کوي.
سره له دې چې د سرپرست حکومت دفاع وزارت دې پېښې ته په خپل لومړني غبرګون کې افغانانو ته د غچ اخیستو ژمنه ورکړه، د شر او فساد ډلو په دې ژمنه ملنډې ووهلې او هغه یې د خپلې واکمنۍ له وخت سره پرتله کول. هغه وخت چې د پاکستان پوځ د افغانستان پر ولایتونو راکټونه غورځول، ګڼ شمېر افغانان یې شهیدانول، د جمهوریت اجیرانو د پاکستان پز لوري د برګ کتلو جرئت هم نه درلود، د غچ اخیستل خو لرې خبره وه.
د شر او فساد ډلو دا باطل خیالونه د ټاکلي وخت په رارسېدو او د سرپرست حکومت له لوري د ډیورنډ کرښې هاخوا د انتقامي بریدونو په پیل سره مات او په اوبو لاهو شول، په دې سره ټولو ته د یوه آزاد او خپلواک حکومت او د یوې مزدورې او لاسپوڅي ادارې تر منځ توپیر لا نور هم روښانه شو، دې انتقامي بریدونو د شر او فساد ډلې د لارویانو خولې د شرم په تار وګنډلې.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.