د پاکستان پوځي رژیم چې له رامنځ ته کېدو راهیسې تر نن ورځې پورې تل د افغانستان د ناامنۍ تر شا لاس لري او هېڅکله یې نه دي زغملي چې افغانستان دې امن او باثباته وي، په افغانستان کې د اسلامي نظام له رامنځ ته کېدو وروسته (هغه نظام چې له ځان سره یې ثبات او امنیت راووړ) بیا هم هڅه کړې چې د معاملهګرو انسانانو او خیانتکارو څېرو په کارولو سره یو ځل بیا افغانستان ناامن کړي.
د هغو فایلونو پر بنسټ چې په دې وروستیو کې د سمیع سادات او په افغانستان کې د هغه د اړوند پوځي قوماندان ترمنځ د خبرو اترو په اړه په رسنیو کې خپاره شوي، داسې څرګندېږي چې د پاکستان پوځي رژیم د افغانستان په ځینو برخو کې د ناامنۍ د رامنځ ته کولو لپاره د افغان حکومت یو شمېر مخالفې څېرې د خپلو پلانونو د پلي کولو په وسیلو بدلې کړې او هڅه یې کوله چې د هغوی پوځي تجهیز وکړي. په دغو خبرو کې له پاکستان څخه د وسلو او مهماتو د برابرولو، د پخوانیو نظامیانو د کارولو او په نورستان او لغمان کې د وسلوالو فعالیتونو د رامنځ ته کولو یادونه شوې ده؛ داسې یو پلان چې که عملي شوی وای، یو ځل بیا به یې د پاکستان د استخباراتي لوبو قرباني بې ګناه افغانان ګرځولي وای.
خو هغه څه چې د دغې دسیسې د طرحه کوونکو لپاره ترخه او د افغانستان د خلکو لپاره هیله بښونکي دي، دا دي چې دا ډول پلانونه تر عملي کېدو مخکې پېژندل کېږي او شنډېږي. د امنیتي ځواکونو ویښتیا او د مشکوکو اړیکو کشف یو ځل بیا وښوده چې د افغانستان د ثبات د دښمنانو پټې پروژې، پخپله د طرحه کوونکو د تصور خلاف، تل په تیارو کې نه پاتې کېږي او ګومارل شوي غلامان یې هم هېڅ کار نه شي ترسره کولی.
خو اساسي پوښتنه دا ده چې ولې د پاکستاني پوځي رژیم دسيسې یو په بل پسې افشاء کېږي؟
لومړی، د پاکستان پوځي رژیم لا هم د افغانستان د امنیتي ځواکونو د اطلاعاتي څارنې او د هېواد د دښمنانو د پټو فعالیتونو او اړیکو په اړه د هغوی د نفوذ او پوهاوي سم درک نه لري. دوی فکر کوي چې د پټو شبکو په جوړولو، د محرمو اړیکو په ټینګولو او د کورنیو واسطو په کارولو سره کولای شي خپل پلانونه له پېژندل کېدو پرته پر مخ یوسي؛ خو حقیقت دا دی چې د دغو اړیکو او فعالیتونو ډېره برخه تر دې مخکې چې عملیاتي پړاو ته ورسېږي، تر څارنې لاندې نیول کېږي او کشفېږي. همدا لامل شوی چې د پاکستان استخباراتي پروژې، د دې پر ځای چې خپلو موخو ته ورسېږي، یو په بل پسې رسوا شي او طرحه کوونکي او پليکوونکي یې هم افشاء شي.
دویم، د پاکستان پوځي رژیم لا هم افغانستان د تېرو وختونو په زړو محاسبو او ماتو ذهنیتونو ارزوي. دوی فکر کوي چې د څو خاینانو، معامله ګرو او بې اصله او بې ریښې څېرو په راټولولو او تجهیزولو سره کولای شي د هېواد امنیت ګډوډ کړي. حال دا چې د نن ورځې افغانستان، د څو لسیزو مخکې له افغانستان سره توپیر لري؛ نن افغانستان د خپلو ویښو، هوښیارو او ولس پالو بچیانو له خوا اداره کېږي؛ داسې کسان چې هېڅ ډول کوچنی خیانت هم نه شي زغملی او په پرانیستو غوږونو او تېزو سترګو د دښمن فعالیتونه او د هغه زنځیر شوي غلامان څاري او د هغوی شوم پلانونه په اوسپنیز مټ له منځه وړي.
درېیم، هغه کسان چې د بهرنیانو لپاره په هېواد کې سیاسي او پوځي جاسوسي کوي، که هر څومره د لویو شعارونو او تېرایستونکو ادعاوو تر شا پټ شي، په پای کې یې د پردیو سره د تړلتیا حقیقت څرګندېږي. تاریخ څو څو ځله ثابته کړې چې له وطن سره خیانت هېڅکله د نوم او شعار په بدلولو په خدمت نه بدلېږي.
خو تر ټولو ستره رسوایي د هغو کسانو حالت دی چې پرون یې د افغانستان په نوم او له پاکستان سره د مقابلې په شعارونو د ځان لپاره سیاسي دریځ جوړاوه، خو نن د پاکستان د پوځي رژیم د پلانونو د پلي کولو لپاره هر ډول ننګینو معاملو کولو ته چمتو دي.
دا نور یوازې د افغانستان له حکومت سره مخالفت نه دی؛ بلکې د یوه ملت په امنیت معامله ده!
هغه کسان چې له ډېرې مودې راهیسې یې ځان د افغانستان د خلکو په سترګو کې وطن پال ښودلی و، نن د خپلو موخو د پلي کولو لپاره پر هماغه رژیم تکیه کوي چې کلونه یې د هغه پر ضد د دښمنۍ شعارونه ورکول. که ستاسو د دښمنۍ شعارونه رښتیني وو، نو ولې د وسلو او مهماتو د برابرولو لپاره اسلام آباد ته سترګې په لار یاست؟ که تاسو د افغانستان د خلکو اندېښنه لرئ، نو ولې د همدې خلکو امنیت او ارامي د خپلو سیاسي جاه طلبیو په بدل کې معامله کوئ؟ او که د وطن پالنې ادعا کوئ، نو ولې خپل برخلیک د پردیو پوځیانو له ارادې سره تړئ؟
تاسو له هماغه پیله پرته له غلامانو بل څه نه وئ؛ توپیر یوازې دا و چې هغه مهال د وطن پالنې او له پاکستان سره د دښمنۍ تر شعارونو لاندې پټ وئ، خو نن ستاسو له اصلي څېرو پرده پورته شوې او د افغانستان د خلکو په عامه نظر کې په ښکاره د یوې بهرنۍ لوبې پر مصرفېدونکو مهرو بدل شوي یاست!
د پاکستان پوځي رژیم هم باید پوه شي چې د نیابتي پروژو او ماتو شوو څېرو د ګومارلو له لارې د افغانستان امنیت په اسانۍ نه شي ګډوډولی. د یوه هېواد ثبات په څو محرمو اړیکو، لږو پیسو او د وسلو په محمولو له منځه نه شي تللی.
افغانستان نور ستاسو د استخباراتي دسيسو د ازمایښت ځای نه دی او هغه کسان چې خپل وطن د پردیو د ملاتړ په بدل کې معامله کوي، تر دې مخکې چې د سیاست په ډګر کې ماتې وخوري، د ملت د وجدان په محکمه او د تاریخ په قضاوت کې محکوم شوي دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.