د پروان ولایت د قلعه میرخان د کلي یو اوسېدونکی، زمری سيدخيلي چې د نشه يي توکو کاروبار او استعمال یې کاوه، د ډېرو تریاکو د کارولو په پایله کې مړ شوی دی.
سرچينې هندوکش غږ ته ويلي، چې یاد کس مخکې د پروان د نشهيي توکو پر وړاندې د مبارزې مديريت منسوبينو له لوري نیول شوی و او شاوخوا درې مياشتې يې په بند کې تېرې کړې وې.
ياد کس له خوشې کېدو وروسته څلور میاشتې تر درملنې لاندې و، خو د ده د زوی په وینا، وروسته له درملنې یې بيا هم د نشه يي توکو کارولو ته مخه کړې وه.
سرچينه وايي، زمري نومي کس څو ورځې وړاندې يو ځل بيا تریاک کارولي او د خپل کور څنګ ته په کرونده کې بېهوښه شوی و، چې هماغه مهال یې د خپلې مېرمنې او زوی په حضور کې ساه ورکړې.
ياده دې وي، چې ځينې مغرضې رسنۍ د تل په څېر بې اساسه ادعا کوي، چې ګواکې ياد کس په زندان کې د ناروغۍ او د شکنجې له امله مړ شوی دی؛ خو کورنۍ یې دا ادعاوې ردوي او وايي، چې نوموړی د بند له مودې وروسته روغ رمټ کور ته ستون شوی و او مړينه يې د تریاکو د زيات استعمال له امله رامنځته شوې ده.