د رياست الوزرا اقتصادي معاونیت خبر ورکړی، چې د تېر ۱۴۰۲ کال د وږي له ۳۱مې نېټې بیا د روان ۱۴۰۳ کال د وږي تر ۳۱مې پورې د ډالرو پر وړاندې د افغانیو په ارزښت کې ۱۴.۵۰ سلنه زیاتوالی راغلی دی.
د اقتصادي معاونیت د معلوماتو له مخې، تېر کال په هېواد کې یو ډالر ۷۸.۸۶ افغانۍ تبادله کېده، چې اوس مهال په هېواد کې یو ډالر ۶۸.۸۸ افغانۍ تبادله کېږي، چې د تېر کال په پرتله ۱۴.۴۰ سلنه لوړوالی ښيي.
اقتصاد معاونیت د افغانستان بانک له لوري د معقولو پولي سیاستونو پلي کول، بهرینو هېوادونو ته اسعارو د قاچاق مخنیوی، صادراتي وده، هېواد کې د ملي او سیمه ییزو پروژو پیل، په دولتي کچه د غیر ضروري لګښتونو مخنیوی، روڼتیا رامنځته کېدل او د نړۍ له هېوادونو سره سوداګریزو اړېکو پراختیا د افغانۍ لوړېدو عمده لاملونه بللي دي.