تېر درې کاله په تبعید کې، د میلیونري پروژو د ترلاسه کولو لپاره د خیالي جبهو، ټولیو او حرکتونو جوړېده دومره ډېر شول، چې شمېر یې لسګونه ته ورسېد، خو هر حرکت او خوځښت، د یو بل حرکت له غړو سره تر شخړې او ژورواختلاف رامنځته کېدو وروسته اعلان شوی دی.
د تېرو څو لسیزو لوبېدلو اجیرانو د نسبي اتحاد او همغږۍ د رامنځته کولو په موخه د “ملي” او “ژغورنې” په دروغجنو شعارونو یوه مجمع، چې په کُل کې د څو خیالي جبهو ټولکه ورته ویلای شو، د رامنځته کېدو او فعالیت پیلولو اعلان وکړ؛ هغه ټولګه چې یوازې پر یوه انلاین ناسته او څو توهین امېزه خبرو له تمرکز پرته نور هیڅ هم نلري.
شر او فساد ته منسوب، د ټولنیزو رسنیو فعالانو په تېرو څو ورځو کې دغه موضوع خورا ګرمه ساتلې ده، ضد او نقیص تبلیغات او مسایل را سپړل کېږي، خو د ژورو اختلافاتو څپې د ټولنیزو رسنیو تر پاڼو رسېدلي دي او هیڅوک یې د ځواب او دفاع لپاره له ځان سره ځواب نه لري.
د یادي خیالي ټولګې اوونۍ لا نه وه پوره شوې، چې د هندوکش غږ لخوا د تورن اسماعیل خان او حنیف اتمر تر منځ او اوس بیا د یونس قانوني او حنیف اتمر تر منځ د ژورو اختلافاتو، بې باورۍ او اشاروي نا خوښۍ غږیز پیغامونه په ټولنیزو رسنیو کې خپاره شول.
د دغه مجمع د شریرو عناصرو تر منځ ژور اختلافات دوه لسیزې او له هغه زیاته مخینه لري، دوی د باج ګیریو، غلا، غصب او نورو غیر قانوني کړنو ډک تاریخ او ژوند لیکونه لري، پخوانۍ دښمنۍ او مخالف موققونه اوس هم دوی په دې نه توانمند کوي چې دوی دې پر یوه دسترخوان ور ټول شي.
د شر او فساد دغه عاملین د واک د ترلاسه کولو مخکې لا په خورا لوړه کچه مخالفتونو کې ښکېل دي؛ که چیرته واک ترلاسه کوي، نو بیا یوه مجمع د لسګونو زور واکانو او قدرت جزیرو په توګه تجزیه کېږي او هر څوک خپلې شخصي ګټې تعقیبوي.
دې دلایلو ته په کتلو، د بربادۍ دا ډله ییزه مجمع د خپلو اختلافاتو د پړسېدلو او ډېرښت له امله د ناکامۍ او انشعاب درشل ته رسېدلې او تر یوه عنوان لاندې یې د راټولولو هره هڅه ناکامه ده.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.