د ټرانسپورټ او هوایي چلند وزارت مرستیال عبدالسلام حیدري د قزاقستان د ترانسپورټ وزارت له مرستیال کالیا کپاروف سره د دوه اړخیزو ترانسپورټي اړیکو د پراخېدو او د کابل-استانې ترمنځ د مستقیمو الوتنو د پیل په اړه خبرې کړې دي.
له یاد وزارت څخه د خپرې شوې خبرپاڼې لهمخې، ښاغلي حیدري قزاقستان سره ټرانسپورټي اړیکې له سیمې او نړۍ سره همکاریو پیاوړتیا په اړه د افغانستان ستراتیژۍ مهمه برخه بللې او په خبره یې، د دې هوکړو عملي کول به د دواړو هېوادونو او سیمې سره په سوداګریزو او ټرانزیټي راکړه ورکړه کې د پام وړ بدلون رامنځته کړي.
خبرپاڼه زیاتوي، قزاقستاني لوري هم له افغانستان سره د ټرانسپورټ برخه کې د دوه اړخیزو اړیکو پر پیاوړتیا ټینګار کړی دی.