د ټولگټو چارو وزارت وايي، د کابل ـ جلالاباد لویه لاره د ماهیپر په سیمه کې یوه عراده خاور ډوله موټر د اصلي مسیر څخه وتلی و، چې د سړک له پورتنۍ برخې څخه لاندېنۍ برخې ته اوښتی و.
له یاد وزارت څخه په خپره شوې خبرپاڼه کې ویل شوي، د دغه موټر د اوښتو له امله لویې او کوچنۍ ډبرې د سړک لاندېنۍ برخې ته ښوېیدلې وې، چې له امله یې یاده لویه لاره پرون مازیگر د لنډ وخت لپاره د ترافیکو پر مخ تړل شوې وه؛ خو د ټولگټو وزارت له لوري یاده لاره اوس پاکه شوې او د ترافیکو پرمخ پرانیستل شوې ده.
په خبرپاڼه کې ویل شوي، په پرونۍ پېښه کې د یوې ښځې او ماشوم په گډون درې تنه وژل شوي او شپږ تنه نور ټپیان شوي وو، چې اوسمهال په روغتیايي مرکزونو کې تر درملنې لاندې دي.
په خبرپاڼه کې خلکو ته ډاډ ورکړل شوی چې د کابل ـ جلالاباد لویه لاره اوس د ترافیکو پرمخ پرانیستل شوې ده.
کابل ـ جلالاباد لویه لاره د هېواد له هغو لویو لارو څخه گڼل کېږي، چې نږدې هره ورځ پرې ترافیکي پېښې کېږي.
دغه لاره چې ډېره برخه یې په غرونو کې تېره شوې او د گڼهگوڼې له ډکو لارو څخه شمېرل کېږي.
تېره میاشت د ریاست الوزراء اقتصادي معاون ملا عبدالغني برادر ننگرهار ته د خپل رسمي سفر پر مهال ویلي وو، چې ډېر ژر به د کابل ـ جلالاباد دویمې لارې کارونه پیل شي.