د کانونو او پټرولیم وزارت په خبرپاڼه کې ویلي، چې د امو دریا نفتي حوزې د څارنې او مشورتي خدمتونو د وړاندې کولو په موخه یې د تاتارستان له TNG شرکت سره د شاوخوا ۲.۸ میلیونه ډالرو په ارزښت یو کلن تړون لاسلیک کړی دی.
د خبرپاڼې له مخې، د تړون د پلي کېدو له لارې به د امو دریا نفتي حوزې د نفتو د استخراج کچه لوړه او اړوند چارې پیاوړې شي. همدارنګه د زمرد سای بلاک د نفتو د پروسس د اسانتیاوو د جوړولو لپاره د ۱۱ میلیونه ډالرو په ارزښت بل تړون هم لاسلیک شوی، چې لومړنۍ مرحله به یې اته میاشتې وخت ونیسي.
د پروسس دغه سیستم به له بشپړېدو وروسته د ورځې د ۲ زره ټنه نفتو د پروسس ظرفیت ولري.