د کرنې، اوبو لګولو او مالدارۍ وزارت ویلي، چې د یاد وزارت وزیر مولوي عطاءالله عمري د ازبکستان د کرنې وزارت په رسمي بلنه د دغه هېواد پلازمېنې تاشکند ته تللی.
وزارت وايي، چې د عمري د سفر اساسي موخه د وچې په منځ کې د راګېر هېوادونو، خوړو خوندیتوب او دوامدارې پراختیا په اړه په نړیوال تخنیکي فورم کې ګډون دی، چې د اکتوبر په ۷مه او ۸مه په تاشکند کې جوړېږي.
د دغه سفر په ترڅ کې به د افغانستان او ازبکستان ترمنځ د کرنې، اوبو لګولو، مالدارۍ، سوداګرۍ او پانګونې په برخو کې د دوهاړخیزو او سیمهییزو همکاریو پر پراختیا هم خبرې وشي. همدارنګه به افغان پلاوی د ګډون کوونکو هېوادونو له استازو سره د کرنیزو محصولاتو د صادراتو، سوداګرۍ، پانګونې او مسلکي تجربو د تبادلې په اړه بحثونه وکړي.