د کورنیو چارو وزیر خلیفه سراج الدین حقاني د پولیسو ځانګړو ځواکونو مرکزي قوماندانۍ کې د یادو ځواکونو لپاره د اوپراتيفي مهارتونو او ظرفيت لوړونې په موخه جوړ شوي سمینار په پای غونډه کې ګډون کړی.
غونډې ته د پولیسو د ځانګړو قطعاتو لوی قوماندان پاسوال امین جان فتح الله ويلي، چې د مشرانو پاملرنه او د کشرانو اطاعت د دې لامل شوی چې یاد ځواکونه په امنیتي برخه کې مهمې لاسته راوړنې ولري.
همدا راز خلیفه سراج الدين حقاني د هېواد په کچه د خوندي او ډاډمن امنیت په برخه کې د ځانګړو ځواکونو هڅې ستايلي او په خبره یې د ځانګړو ځواکونو په وړتیا او لاسته راوړنو نه یوازې دوستان بلکې دښمنان هم اعتراف کوي.
ښاغلي حقاني د ځانګړو قطعاتو مسؤلینو ته سپارښتنه کړې چې له هېوادوالو سره په چلند کې اخلاص، عاجزي او احتیاط رعایت کړي او د اسلامي نظام د بقا لپاره له خپلو جسماني او باطني وړتیاوو څخه ګټه واخلي.