د کډوالو او بېرته راستنېدونکو چارو وزارت د یوې اعلامیې په خپرولو سره ویلي، پاکستان کې افغان کډوال له خپلو کورونو، هټیو او بازارونو څخه په غیر قانوني ډول نیول کیږي او په زوره زندانونو ته تر وړل کېدو وروسته اړ ایستل کیږي، چې افغانستان ته ستانه شي.
په اعلامیه کې راغلي چې، له افغان کډوالو سره زیاتی کېږي، د هغوی شتمنۍ لوټل کېږي او د کورونو اسباب ترېنه ایسارېږي، چې دا د هر ډول اسلامي او انساني اصولو او نړېوالو قوانینو خلاف عمل دی.
یاد وزارت د پاکستان حکومت څخه هیله ښودلې، چې د کډوالو پر وړاندې پیل شوی تاوتریخوالی او ناوړه چلند پای ته ورسوي او هغوی دې د سیاسي موخو لپاره نه کاروي.
په اعلامیه کې راغلي، چې سرپرست حکومت د بېرته راستنېدونکو کډوالو لپاره چمتووالی پیل کړی، خو له هغوی سره د ګاونډیو ناوړه چلند د منلو او تحمل وړ نه دی.
کډوالو او بېرته راستنېدونکو چارو وزارت ټینګار کړی چې، ټولو افغان کډوالو ته دې اجازه ورکړل شي، چې خپلې شتمنۍ، مالونه او د کور اسباب له ځانه سره خپل هېواد ته را ولېږدوي.