د گوانتانامو دوه افغان بندیان نن کابل ته ورسېدل

د کورنیو چارو وزارت وايي، په گوانتانامو کې دوه افغان بندیان نن کابل ته ورسېدل. د یاد وزارت ویاند عبدالمتین قانع په خپله اېکس‌پاڼه لیکلي، ملا عبدالظاهر صابر او عبدالکریم چې په عمان کې نظربند وو، نن کابل ته راستانه شول. د ښاغلي قانع په خبره، ملا عبدالظاهر صابر د لوگر اوسېدونکی او عبدالکریم د خوست اوسېدونکي دي، چې دواړه په ۲۰۰۲ز کال کې امریکايي عسکرو نیولي وو. نوموړي لیکلي، دواړه په ۲۰۱۷ز کال کې له گوانتانامو څخه خوشې او عمان ته ولېږدول شول، چې هلته تر څار لاندې وو او د سفر له اجازې پرته همالته وو: «ملا عبدالظاهر صابر د لوگر د حصارک کلي اوسېدونکی دی. په ۲۰۰۲ز کې د امریکايي عسکرو له لوري ونیول شو. څلور میاشتې یې په بگرام کې تېرې کړې او وروسته د گوانتانامو زندان ته یوړل شو. د ۲۰۱۷ز کال د جنوري په ۱۶مه د گوانتانامو له زندان څخه ازاد او عمان ته ولېږدول شو. په عمان کې هم ۷ کاله تر څار لاندې وو او د افغانن حکومت په هڅو اوس کابل ته راستنېږي.» دی وايي، د اسلامي امارت د هلو ځلو په پایله کې پر دواړو لگېدلي بندیزونه لرې شول او اوس به خپل هېواد ته راستانه شي. د ۲۰۲۲ز کال د جون پر ۲۵مه هم له گوانتانامو زندان څخه د اسدالله هارون د اوسني حکومت په هڅو راخوشې شو او کابل ته راستون شو. اسدالله هارون هم په ۲۰۰۷ز کال کې امریکايي عسکرو نیولی و، چې د ۱۵کاله زندان تېرولو وروسته راخوشې شو. پرو سږکال د بشیر نورزي په نامه هم یو افغان د گوانتانامو له زندان څخه ازاد او افغانستان ته راستون شو. عبدالظاهر صابر او عبدالکریم څوک دي؟ ملا عبدالظاهر صابر د ملا عبدالقادر زوی، د لوگر د مرکز اړوند د حصارک د کلي اوسېدونکی دی. په ۲۰۰۲ز کال د مې په ۱۰مه په خپل کور کې امریکايي ځانگړو عسکرو له لوري ونیول شو او بگرام کې د څلورو میاشتو تېرولو وروسته د همدغه کال د اکټوبر په میاشت کې گوانتانامو ته ولېږدول شو. د ۲۰۱۷ز کال د جنوري میاشتې په ۱۶مه امریکايي عسکرو له لوري له دغه زندان څخه د عمان سلطنت ته انتقال شو. له څلورو میاشتو تېرولو وروسته یې کورنۍ هم یاد هېواد ته واستول شوه. په عمان کې د ۷ کاله ژوند تېرولو وروسته اوس بهر ته د تگ اجازه ورکړل شوه. عبدالکریم د گل قدیم زوی د خوست د تڼیو ولسوالۍ د ووزیانو د کلي اوسېدونکی دی. په ۲۰۰۲ز کال د اگسټ په ۱۴مه د خیبرپښتونخوا اړوند د میران شاه او پېښور ترمنځ ونیول شو. په پاکستان کې له څو میاشتې زندان تېرولو وروسته د پاکستاني پوځ له لوري امریکايي عسکرو ته وسپارل شو او د ۲۰۰۳ز کال په لومړیو کې گوانتانامو زندان ته ولېږدول شو. ښاغلی عبدالکریم هم د ۲۰۱۷ز کال د جنوري په ۱۶مه عمان ته انتقال شو. له څلورو میاشتو تېرولو وروسته یې کورنۍ هم یاد هېواد ته واستول شوه، چې نن به خپل هېواد ته دواړه راستانه شي. د گوانتانامو زندان په ۲۰۰۱ز کال د سپټمبر له پېښو وروسته په کیوبا کې جوړ شو، چې پر افغانستان د امریکايي یرغل وروسته ورته زرگونه افغانان او عربان ولېږدول شول. په گوانتانو زندان کې لا هم دوه افغانان تر اوسه بندیان دي