نوین ساپی
تر دا مهاله په پاکستان کې د ټاکنو د څرګندو پایلو په بنسټ د دې هېواد د پخواني صدراعظم عمران خان مربوطه نوماندانو د ۲۶۴ څوکیو څخه یې ۹۳ ګټلي او تر نورو مخکې دي، عمران خان لا په زندان کې شپې او ورځې سبا کوي.د یوه بل پخواني صدراعظم نواز شریف ګوند بیا ۷۵ څوکۍ ګټلي، دا ټیم اکثریت نه دی خو په پارلمان کې تر ټولو لوی ګوند دی، ځکه د عمران خان کاندیدانو په مستقل ډول ځانونه کاندید کړي وو، د هغوی ګوند په ټاکنو کې له ګډون څخه منع شوی هم و.په پاکستان کې د ایتلاف په جوړېدو خبرې روانې دي او دا لا څرګنده نه ده چې کوم ګوند به د حکومت واګي په لاس کې واخلي. د دې هیواد د ټاکنو کمېسیون له انتخاباتو څخه ۶۰ ساعته وروسته د ټاکنو پایلې اعلان کړې، دې ځنډ هم یو لړ پوښتنې پیدا کړې دي.د عمران خان او د هغه سیال ګوند دواړه د ټاکنو د ګټلو دعوې کوي او دغه کار د پاکستان نامعلوم برخلیک نور هم تت کړی دی، په اوس وخت کې پاکستان له اقتصادي بحران سره لاس او ګریوان دی، له دغه حالت څخه د ځان ایستلو لپاره باید له نړیوال وجهي صندوق څخه پور واخلي او په دې اړه خبرې وکړي.د پاکستان ملي اسمبلۍ به په راتلونکو څو ورځو کې کار پیل کړي او باید د صدارت څوکۍ ته کاندید ۱۶۹ رایې وګټي.دا به د ایتلافیانو ترمنځ له خبرو وروسته جوته شي او څرګنده به شي چې د عمران خان مربوط نوماندان به له نورو وړو ګوندونو سره یو ځای کېدای شي چې یو بلاګ جوړ کړي.همهاله د عمران خان پلویانو ګواښ کړی وو که د یکشنبې فبرورۍ ۱۱ (سلواغه ۲۲) تر شپې پورې د ټاکنو نهايی پایلې اعلان نه شي، دوی به سوله ایزې مظاهرې وکړې، یو امنیتي مقام رسنیو ته ویلي دي چې د عمران خان ۳۰۰ پلویانو له پېښور څخه اسلام اباد ته تللې لویه لار تړلې ده.عمران خان د دولت د محرمو اسنادو، فساد او نورو تورونو له کبله زنداني شوی او په ټاکنو کې د درېدو حق ترې اخیستل شوی و، خو میلیونونو پلویانو یې رایې وکارولې او د ده اړونده نوماندانو په مستقل ډول ځانونه کاندید کړل او ۹۳ څوکۍ یې ګټلې دي. د حکومت د جوړولو په برخه کې د هغو کاندیدانو، چې په مستقل ډول بریالي شوي، یوه ستونزه دا ده چې دوی د ګوند له لوري پارلمان ته نه دي ورغلي او په همدې اساس حکومت هم نه شي جوړولای.د عمران خان سیال، نواز شریف د ګوند یو ویاندې ویلي دي، دوی وار له مخه د نورو ګوندونو له استازو سره خبرې کړي دي او په عمومي توګه یوې موافقې ته سره رسېدلي دي، چې د پاکستان د ګټلو لپاره به یوځای کار کوي.