د یمن حوثي وسلهوالو پوځي ویاند جنرال یحیی السریع د یوې اعلامیې په خپرولو سره ويلي، چې د غزې تړانګې د ملاتړ په موخه یې د صهیونیستي رژیم د سمندري محاصرې څلورم پړاو پیل کړی دی.
نوموړي زیاته کړې، چې له دې وروسته به هره هغه بېړۍ چې د اسرائیل (اشغال شوي فلسطین) بندرونو سره سوداګریز تعامل لري له توپیر پرته به د حوثیانو د برید هدف وي.
السریع ټولو نړیوالو شرکتونو ته خبرداری ورکړی، چې ژر تر ژره دې له اسرائیلي بندرونو سره راکړه ورکړه بنده کړي؛ که نه نو د دوی بېړۍ به په هر موقعیت کې د یمني ډرونونو او توغندیو هدف وګرځي.
د حوثیانو پوځي ویاند زیاته کړې، چې د صهیونیستي رژیم د څلورم پړاو سمندري محاصرې موخه پر غزې د صهیونیستي د یرغل پای ته رسول او د دغې تړانګې د محاصرې ماتول دي.