د ملي دفاع وزارت اړوند ۲۰۱ خالد بن ولید قول اردو له ښوونیز مرکز څخه ۷۳۰ تنه منسوبین له درې میاشتنیو پوځي او عقیدوي زدهکړو فارغ شول.
ملي دفاع وزارت وایي، په همدې پار جوړو شویو مراسمو کې د ستر درستيز مرستيال حاجي مالي خان صدیق، د یادې قول اردو قومندان، ګڼ شمېر مسؤلینو او منسوبینو ګډون کړی وو.
د ستر درستیز مرستیال په خپلو خبرو کې ویلي، چې افغان ځواکونه په لوړ مورال، اسلامي او ملي روحيې سره د هیواد له ځمکنۍ بشپړتيا څخه دفاع کوي او هېڅ پردي پاله او مزدور ته د هېواد په داخلي چارو کې د لاسوهنې اجازه نه ورکوي.
د یادونې ده چې تېره ورځ د شهید افتاب فرقې له ښوونیز مرکز څخه هم ۲۵۰ تنه ځوان سرتېري فارغ او د ملي اسلامي اردو لیکو ته جذب شوي وو.