د ټولګټو وزارت ویاند محمد اشرف حقشناس ویلي، چې د ۱۴۰۵ هـ.ش کال په جریان کې یې د هېواد په بېلابېلو ولایتونو کې د سړکونو د ساتنې او څارنې ۴۹ پروژې د ۸۴۶ میلیونه، ۴۸۵ زره او ۹۳۴ افغانیو په ارزښت له خصوصي ساختماني شرکتونو سره قرارداد او پیل کړې دي.
د حقشناس د معلوماتو له مخې، په دغو پروژو کې د سړکونو ترمیم، بیارغونه، جغلاچونه، پراخول، د سړکونو د فرش ترمیم، د ګارډرېلونو نصب او د استنادي دېوالونو، پلونو او پلګوټو بیارغول شامل دي.
نوموړی زیاتوي، چې ټولګټو وزارت په روان کال کې د تېر کال د انتقالي او روان کال د نویو قرارداد شویو پروژو په ګډون، د ساتنې او څارنې ۸۳ پروژې تر کار لاندې لري او همدارنګه د ۱۴۰۵ هـ.ش کال په جریان کې یې د ۱ میلیارد، ۲۷۱ میلیونه، ۷۴۳ زره او ۸۱۹ افغانیو په ارزښت د ۳۷ پروژو چارې هم بشپړې کړې دي.