د نړیوالو رسنیو د راپورونو پر بنسټ، نن پنجشنبه د روسیې د ملي شوری “دوما” استازو په متفقه توګه له شمالي کوریا سره د هراړخیزه ستراتیژیکو همکاریو تړون تصویب کړ.
ولادیمیر پوتین او کیم جونګ اون د روان کال د جون میاشتې په وروستیو کې دغه تړون لاسلیک کړی و. د دې تړون له تصویب وروسته د مسکو او پیونګ یانګ ترمنځ د هراړخیزه ستراتیژیکو همکاریو تړون به سر له نن څخه عملي شي.
دا تړون په داسې حال کې تصویبېږي چې د روسیې او شمالي کوریا ترمنځ د اوکراین په جګړه کې د پوځي همکاریو راپورونه رسنیز شوي.
