روغتیا وزارت: د لومړي ځل لپاره د گوزڼ د تشخیص لابراتوار فعال شو

د عامې روغتیا وزارت وايي، د لومړي ځل لپاره په کابل کې د پولیو(گوزڼ) لابراتوار پرانیستل شو، چې له پرانیستل کېدو وروسته به د ګوزڼ ناروغۍ په تشخیص کې رغنده رول ولري.له یاد وزارت څخه په خپره شوې خبرپاڼه کې ویل شوي، د عامې روغتیا وزارت د گوزڼ ناروغۍ په له منځه وړلو کې جدي گامونه اخیستي او موخه مو په ۲۰۲۴ز کال کې افغانستان له گوزڼ څخه د پاک هېوادونو په نوملړ کې راوستل دي.په خبرپاڼه کې د روغتیا د چارسمبالي وزیر قلندر عباد له قوله ویل شوي، له دې وړاندې په هېواد کې دغه ډول لابراتوار نه و. :« دا لومړی ځل دی چې په افغانستان کې د پولیو د تشخیص لابراتوار پرانیستل کېږي چې د پولیو ناروغۍ په ژر او کره تشخیص کې اړین رول لري او د دې لابراتوار پرانیسته د افغانستان اسلامي امارت د عامې روغتیا وزارت د پولیو د له منځه وړلو په برخه کې د جدیت ښکارندويي کوي.»د ښاغلي عباد په خبره، د افغانستان اسلامي امارت له واکمنېدو راپدېخوا د هېواد په روغتیايي سکټور کې د پام وړ بدلون راغلی، په ځانګړي ډول د ابتدايي، ثانوي او ثالثي روغتیايي خدمتونو په برخه کې او د پولیو پېښې د پخوا په پرتله کمې شوي دي او په دې برخه کې هڅې روانې دي. : « د لابراتوار د نتایجو په پایله کې موږ کولی شو کره پرېکړې وکړو او د پولیو په پروګرام کې لا نور اصلاحات رامنځته کړو.»د پرانیستې په دغه مراسمو کې د ختیځې مدیترانې سیمې لپاره د روغتیا نړیوال سازمان د پولیو د برخې مسوول ډاکټر حمید جعفري وویل، د دې لابراتوار پرانیسته د گوزڼ ناروغۍ او له منځه وړلو په برخه کې ستره لاسته‌راوړنه ده. په افغانستان کې د پولیو د تشخیص لابراتوار په لومړي ځل د بېل ګېټس بنسټ، روغتیا نړیوال سازمان او د پولیو د لابراتوارونو د نړیوالې شبکې په ملاتړ جوړ شوی دی چې نن ګټې اخیستنې ته وسپارل شو.افغانستان له دې وړاندې دغه ډول لابراتوار نه درلود او د گوزڼ د پېښو معاینات په پاکستان کې کېدل.