د ۲۰۲۱م کال د اکتوبر په ٧مه د ملګرو ملتونو د بشري حقونو شوری یو پرېکړهلیک تصویب کړ چې پر اساس یې په افغانستان کې د بشري حقونو د وضعیت په اړه د ځانګړي راپور ورکوونکي ماموریت تاییدوي.
د ۲۰۲۲م کال د اپرېل په لومړۍ نېټه ریچارډ بینېټ په دې دنده وګمارل شو او د همدې کال د مې په لومړۍ نېټه یې په رسمي توګه خپله دنده پیل کړه، څو څو ځله یې افغانستان ته سفرونه وکړل او د بشري حقونو د وضعیت په اړه یې راپورونه جوړ کړل.
ریچارډ بینېټ چې څو وارې افغانستان ته سفرونه وکړل، د بشري حقونو د وضیعت په اړه یې ضد او نقیص راپورونه خپاره کړل، د حقیقت پرځای یې افواهاتو ته هواوې ورکړې.
ریچارډ بینېټ د شرعي حاکم نظام ضد، مخالفو ډلو ټپلو او له دې سره یې د شر او فساد د غړو خبرې واورېدې، په حقیقت یې سترګې پټې کړې او تر نړیوالو یې شایعات ورسول.
دا چې ریچارډ بینېټ غلط او د حقیقت خلاف راپورونه نشرول، طالبانو د روان ۲۰۲۴م کال له اګست میاشتې افغانستان ته د نوموړي په راتلو بندیز ولګاوه.
بینېټ په یوه نوي خپور کړي راپور کې ویلي چې، د دغه راپور موندنې به د راروانې نومبر میاشتې په لومړۍ د ملګرو ملتونو عمومي اسمبلې ته وړاندې کړي.
ریچارډ بینېټ په خپله ایکسپاڼه لیکلي چې، دغه راپور په افغانستان کې د بشري حقونو په تېره بیا د ښځو، نجونو، ماشومانو او لږکیو د بشري حقونو خرابېدونکی وضعیت بیان کړی دی.
بینېټ یوځل بیا له منافقت او شیطانت څخه کار اخیستی، په خپاره کړي راپور کې یې د بشري حقونو ښه وضیعت خراب بللی دی.
لکه څنګه چې د اسلامي امارت ویاند ذبیح الله مجاهد ویلي و چې، ریچارډ بینېټ د افغانستان پر ضد د پروپاګند دنده په غاړه درلوده، په پروپاګند بوخت و او یوه ډېره وړه مسئله یې لویوله؛ نو له همدې امله ریچارډ بینېټ ته نور اجازه نه ورکول کېږي چې افغانستان ته سفر وکړي.
اوس یې هم همدا چاره په خپاره کړي راپور کې مخې ته وړې، له لرې یې د شر او فساد په خبرو قضاوتونه کړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
