د هرات ولایت مقام رسنیز دفتر وایي، د افغانستان سرپرست حکومت له ایران څخه په زور اېستل کېدونکو افغان کډوالو ته د پراخو وړیا خدماتو زمینه برابره کړې.
سرچینې د یوې خبرپاڼې په خپرولو سره ویلي، چې په دغو خدماتو کې د کورنۍ هر غړي ته دوه زره افغانۍ نغدي ورکول، د غرمې او شپې لپاره د خوړو ویش، له خپلو کورنیو سره د اړیکې لپاره هر کس ته د سیم کارت وېش، د اسلام قلعه له پولې څخه خپلو ولایتونو ته وړیا ټرانسپورټي خدمات، وړیا روغتیایي خدمات او مستحقو کورنیو ته د ځمکې ویش شامل دي.
د سرپرست حکومت مسئولینو دغه ۲۴ ساعته خدمات د خپلو مسئولیتونو برخه ګڼلې او ټینګار یې کړی، چې هڅه کوي په راتلونکي کې هم افغان کډوالو ته لا زیاتې چوپړتیاوې وړاندې کړي.