نږدې زر کلونه وړاندې، په ننني افغانستان کې یو چا د محمود غزنوي په نوم نړۍ ته سترګې وغړولې، تقدیر او برخلیک یې دا و چې خپل، د افغان ملت او اسلامي اُمت نومونه د سوچه اسلامي واکمنۍ له لارې روښانه او وځلوي.
سلطان محمود غزنوي د اسلامي اُمت په ګټه د ډېرو ویاړونو په راوړلو سره، نه یوازې دا چې خپله واکمني یې د اسلامي نړۍ په تاریخ کې د یوه ځواکمن او نوموتي حکومت په توګه ثبت کړه، بلکې دا واکمني لا هم د اسلامي هېوادونو د واکمنانو لپاره په اسلامي تاریخ کې د یوه دایمي یاد او بېلګې په توګه تلپاتې ده.
په دې وروستیو کې د پاکستان د دفاع وزیر خواجه آصف د اسلامي نړۍ د دې وتلي شخصیت په اړه سپکې او ناسمې خبرې کړې دي. اړتیا ده تر څو د پاکستان د دفاع وزیر د دې څرګندونو په ځواب کې ووایو چې د محمود غزنوي په څېر د یو ستر شخصیت نوم په دومره اسانۍ، له دلایلو پرته د میکروفون تر شا تحریفول، نشي کولای د تاریخي حقایقو په بدلون کې اغېز ولري.
د پاکستان د دفاع وزیر له توهین ډکې څرګندونې د اسلامي اُمت له تاریخي حافظې څخه د دې ستر اسلامي شخصیت نېک نوم نشي لرې کولای، بلکې د دې ډول شخصیتونو توهین او سپکاوی به ددې لامل شي چې مسلمان ځوانان د دې لویو شخصیتونو ژوند لیک بیا ځلې مطالعه او ولولي.
د سلطان محمود غزنوي په څېر د یو داسې شخصیت د نوم بدولو لپاره چې د اسلامي نړۍ د ځواکمن او خادم سلطان په توګه د دوه میلیارده اُمت په ذهنونو کې نقش او ثبت دی، ډېرو هڅو ته اړتیا ده؛ لومړی ګام د ابن کثیر، ذهبي، ابن اثیر، ابن خلدون، عبدالحی حنبلي او تاج الدین سبکي په څېر د لویو تاریخ لیکونکو د معتبرو کتابونو له منځه وړل دي، وروسته بیا پر دې لوی شخصیت برید کولای شي.
تاریخ د بشریت حافظه ده، د تدوین او لیکل شوي تاریخ پوهې او معارف د اسلامي نړۍ ستر شخصیتونه د تاریخ په کتابونو کې ثبت کړي دي. د نننیو وسایلو توان، د انساني فکر، پوهې او خلاقیت ژوروالي ته چې د لوستلو او لیکلو له لارې ترلاسه کېږي، نشي رسېدلی.
له همدې کبله د اسلامي نړۍ د ختیځ د ستوري محمود غزنوي ویاړ او عظمت چې د اسلامي تاریخ په زرینو پاڼو کې ثبت شوی دی، تل به ژوندی او تلپاتې وي او هېڅوک دا نقش شوی تاریخ له منځه وړلای نشي.
بل لوري ته د پاکستان د دفاع وزیر دغه له توهین ډکې څرګندونې په داسې حال کې کېږي، چې د پاکستان پوځ خپل نوي توغندي د محمود غزنوي په نوم نومولي دي. له دې څخه څرګندېږي چې خواجه آصف نه یوازې د اسلامي نړۍ له تاریخ څخه ناخبره دی، بلکې د خپل هېواد، پوځ او خپلو مسؤلیتونو په اړه هم پوهه نه لري. په دې خبرو سره یې په عملي توګه خپله دنده هم تر پوښتنې لاندې راوستې ده، دی سلطان محمود غزنوي غل او ډاکو بولي، نو بیا څرنګه شونې ده چې د خپل پوځ توغندي د هغه په نوم نوموي!؟
د محمود غزنوي په نوم د پوځ د توغندیو له نومولو سره د خواجه آصف دا ټکر خبرې او د پاکستان د ملت له لوري یې په ټینګه ردېدل، د روښانه حقیقت څرګندونه کوي او د پاکستان د ملت، اسلامي نړۍ او تاریخي واقعیتونو هغه ځپونکی ځواب دی چې د خواجه آصف څرګندونو ته یې ورکړی دی.
یادونه: په هندوکش غږ کې خپرې شوي لیکنې او نظریات یوازې د لیکوالانو د نظر څرګندونه کوي، د هندوکش غږ توافق ورسره شرط نه دی.