سمیع سادات په ۱۳۶۵ لمریز کال د کابل، خیرخانه کې له بدخشاني پلار او هلمندۍ مور څخه وزیږېد؛ سادات په غربي هیوادونو پولنډ، آلمان، انګلیستان او آمریکا کې په نظامي او د اداري مدریت په برخه کې زده کړي وکړې.
سادات د حامد کرزي د حکومت په دوران کې د ملي امنیت په نوم اداره کې پر کم عمر لوړې دندې ترسره کړې چې په دې سره هغه روابط چې د خپل تحصیل په دوران کې له غربيانو سره جوړ کړي وو، لا قوي کړل؛ هماغه و چې په ۲۰۰۸م کال کې د کورنیو چارو وزارت د پولیسو سلاکار وټاکل شو.
د سادات اصلي تمرکز په خپل شخصي تجارت وو چې د دوو شرکتونو په وسیله یې ترسره کاوه؛ هغه د نظامي تجهیزاتو د پیر او پلور کار کاوه، هغه په تجارت کې خپلې اړیکې لا قوي کړي او کله چې امریکایان په دې ډاډه شول چې سادات له جنرال رازق وروسته د دوی لپاره ښه لاسپوڅی کېدای شي؛ نو هغه یې نظامي برخې ته راوست.
سادات په ډېر کم عمر او د امریکایانو په مرسته د جنرالۍ رتبه وګټله؛ هغه په جنګ کې بریالی نه وو خو د پیاوړو تبلیغاتو او قوي بهرني ملاتړ په واسطه یې وکولای شول د اشرف غني په اداره کې د دفاع وزارت په مهمو پوستونو کار وکړي.
سمیع سادات د رسنیو سره اړیکې درلودې او له دې لارې یې په تبلیغاتو ځان د افغانستان په تېر جمهوري حکومت کې د یو اتل او ځوان جنرال په توګه مطرح کړی وو، چې د افغانستان په سقوط سره یې له دې جالي شخصیته پرده پورته شوه او اصلي څهره یې وښودله.
سادات د کابل د سقوط پر مهال بهرنیو یرغلګرو ته زارۍ کولې چې له طالبانو سره په جګړه کې دده ملاتړ وکړي مګر هغوی دده لافو شخصیت پېژندلی وو او نور د خپلې تاریخې ماتې جبران ورته سخت وو ځکه یې سادات ته د مرستې لاس ور نه کړ؛ د کابل د سقوط په شپه سادات افغانستان پریښود خو له بهره(امریکا) څخه یې د شر او فساد هڅو ته دوام ورکړ.
سمیع سادات د کابل په سقوط سره نه یوازي خپل جالي حثیت له لاسه ورکړ، بلکې شخصي تجارت ته یې چې د افغانستان په جګړه ولاړ وو، هم دروند زیان ورسېد؛ ځکه نو د یادو هدفونو د لاسته راوړلو لپاره په بهرنیو مشرانو د مرستې کچکول ګرځوي.
سادات په تېرو دریېو کلونو کې د امریکا سناء مجلس په غړو سربېره په لس ګونو هغه خلکو د مرستې کچکول ګرځولی چې د افغانستان په شل کلنه قضیه کې دخیل پاتې شوي.
څو ورځې وړاندې رسنیو د ټرمپ له لوري په افغانستان کې جنګېدلي پوځي افسر مایک والټز د ملی امنیت سلاکار ټاکلو خبر ورکړ؛ خو له دې وروسته د سمیع سادات یو غږیز پیغام خپور شوی چې سناتور والټز ته یې د مبارکۍ په پار لېږلی.
په دې پیغام کې سادات له والټز څخه په ډېر بې شرمانه ډول غوښتي چې د افغانستان په بیا نیولو کې دده مرسته او هوائې ملاتړ وکړي؛ هغه زیاته کړې چې زما له درې کاله پرلپسې زاریو وروسته ته(والټز) زما یوازینۍ هیله یې.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.