د ایران د اسلامي انقلاب د سپاه پاسداران سمندري ځواکونو ویلي، چې د هرمز پر ستراتیژیک تنګي بشپړ او پرېکنده کنټرول لري او له ایران سره له همغږۍ پرته د دې اوبو له لارې د تېرېدو هڅه کوونکې بېړۍ به له سخت غبرګون سره مخ شي.
د سپاه په اعلامیه کې د هرمز تنګې د پرانیستې په اړه د امریکايي چارواکو څرګندونې «ښکاره دروغ» بلل شوي او ویل شوي، چې دغه تنګی د هغو بېړیو پر مخ تړلی دی، چې له ایران سره له همغږۍ پرته د تېرېدو هڅه کوي.
سپاه زیاته کړې، چې دا وضعیت به د امریکا پر وړاندې د پوځي اقداماتو تر پای ته رسېدو او د اړوندو ژمنو تر عملي کېدو پورې دوام ولري.
د سپاه سمندري ځواکونو ټینګار کړی، چې د هرمز تنګې د کنټرول په برخه کې به له خپل ټول ځواک او امکاناتو څخه کار واخلي او د دې ستراتیژیکې اوبو لارې د تګ راتګ وضعیت به د ایران له پرېکړو سره سم تنظیمېږي.