د پرځېدلي جمهوريت پر مهال د دفاع سرپرست وزیر شاه محمود مياخېل په يوه ليکنه کې جمهوريت ته په اشارې ويلي، چې واکمنو یې له فرصتونو ګټه وانخیسته؛ بلکې ډېری فرصتونه یې په بحران بدل کړل.
نوموړي زياتوي، چې هغوی د افغانستان د باثباته راتلونکي لپاره داسې میکانېزم یا تګلاره نه درلوده، چې هېواد له بحران وباسي او د سوکالۍ او تلپاتې سولې په لور یې بوځي.
هغه زياته کړې، چې هغوی خپلې ستونزې نه منلې، په کاذب غرور کې قید و، د انکار حالت پرې غالب و او بهرنیان به یې د ستونزو حل کوونکي ګڼل.
میاخېل که څه هم کوم حاکمیت نه دی مشخص کړی، خو ورته بې کفایتي او ستونزې په پرځېدلي جمهوریت کې ډېرې تر سترګو کېدې.