شر او فساد ډله چې په مشري کې یې د پرځېدلي جمهوریت یو شمېر مسؤلین قرار لري، په افغانستان کې د طالبانو په وړاندې د مبارزې په خیالي شعار خلک بغاوت ته هڅوي او د جمهوري ارزښتونو پر بنسټ، د افغانستان د تجزیې لپاره هڅې کوي.
شر او فساد ډله ځان په افغانستان کې د اوسني حکومت بدیل ګڼي او د ذهنیت جوړونې له پاره په تبلیغاتي جګړه بوخت دي؛ مګر عامه افکار بیا د شر او فساد د شل کلن حاکمیت پر مهال بلې خوا ته سوق شوي او د تاریخ په پاڼو کې یې توري دورې په څرګندو ټکو لیکل شوې دي.
د شر او فساد ډلې مشران او غړي په افغانستان کې لومړی د سړې جګړې پر مهال له هېواد سره د کړو خیانتونو او بیا د امریکايي متحدینو د نظامي حضور پر مهال په فساد، بې عدالتۍ، مظالمو او ناکام ماموریت کې سمبول ګرځېدلي وو.
د افغانستان ولسونه له پنځه لسیزو انقلابونو، جګړو او بې ثباتۍ څخه ستړي دي، اوس د امنیت، ثبات، مرکزي نظام او واحد افغانستان پر داعیه ور ټولېږي؛ د شر او فساد ډلې تېرې سابقې ته په کتلو، د دغه ډلې ولسي ملاتړ لا پسې د لاسه ورکړی او د خپل تور تاریخ له کبله یې د بیا اعادې توان نلري.
له بلې زاویې که تحلیل شي؛ نو دې حقیقت ته ترې رسېږو، چې شر او فساد ډله دوه ځله د بهرني ملاتړ په زور واک ته رسېدلې، له بهرني ملاتړ سره دغه ډله مجبوره کېږې چې په افغانستان کې د هغوی ګټو ته په ژمنتیا حکومتي چارې تنظیم کړي، اسلامي او ملي ارزښتونه تر پښو لاندې کړي او یا هم مجبور دي چې دا اسلامي خاوره بیا ځل د وسلوالو یرغلګرو په واک کې ورکړي او هغوی یې د خپلو سیمه یيزو ګټو د تأمین لپاره استفاده کړي.
خو په افغانستان کې د نورو هېوادونو ګټو ته ژمنتیا یا د هغوی نظامي حضور هیڅکله د افغانستان ولس ته د منلو نه دی، له همدې کبله که د شر او فساد لارویان واک ته د یرغلګرو په ملتیا ستانه هم شي، د واک موده به یې لنډه او هڅې به یې د تېر په څېر، په اوبو لاهو شي، ځکه د شر او فساد وجود هیڅ مسلمان وګړي ته د منلو نه دی.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.