ارغوان وطنیار
د اطلاعاتو او فرهنګ وزارت پخواني معین شیوای شرق ویلي چې ډیورنډ کرښه یو رسمي سرحد دی او هيڅوک ترې سترګې نه شي پټولی، شیوای شرق دا خبره هم ورپسې زیاته کړې که پښتانه دا کرښه په رسمیت نه مني، موږ خراسانیان یې منو، پښتانه دې زموږ سیمه پریږدي او د سلیمان غره ته دې پورته شي. دا یې هم ویلي چې د پښتنو مشرانو او هر حکومت په ضمني ډول هم دا کرښه منلې ده.حال دا چې د کمونست نجیب نه راواخله تر ننه پورې کوم حکومت دا کرښه نه ده منلې.ملا محمد عمر مجاهد ته په کندهار کې دا وړاندیز نصیرالله بابر کړې و او د وخت امیرالمومنین له خپل دسترخوان شړلی و.د اسفندیار ولي خان هغه ویډیو اوس هم یوټیوب او خواله رسنیو کې کتلی شئ چې وايي پښتون میلمه پاله ولس دی مګر د خپل د ملي ګټو دښمن یې که میلمه هم وي رټي یې.بیا همدا خبره کوي چې نصیرالله بابر په کندهار کې ملا محمد مجاهد ته د همدې فرضې کرښې وړاندیز کوي، که دا په رسمیت وپيژنئ، همدې خبرې سره د لوی ملا صاحب تندی ګونځې کیږي له ډیره قهره بابر له دسترخوانه او له خپلې حجرې شړي.د نړۍ په هېڅ ارشیف کې به داسې کوم سند پیدا نه شي چې په هغې افغان حکمرانانو امضاء کړي وي او دغه د افغانستان له بدنې پرې شوې سیمه او جغرافیه يې پاکستان باندې خرڅه کړي وي. یا یې د دې جغرافیې قباله چاته ورکړې وي. که احیاناً داسې کار شوی هم وای دا سودا د منلو نه ده، حکمرانانو دا صلاحیت نه درلود چې د ولسونو برخلیک باندې دې کوم پاچا تصمیم ونیسي.همدا د شر او فساد لکۍ ګانې د هماغو استخباراتي کړیو برخه دي او د هماغه استخباراتي زنځیر تسلسل دی، چې وخت ناوخت ورته ویل کیږي چې داسې زهر لړلې وکړه، دوی دا خبرې خپله نه کوي بلکې په دوی کیږي. او د همدې لپاره پرې کیږي چې د میلونو انسانانو په زخمونو مالګې وشیندي.دا یوازې شیوای شرق نه دی چې د هغوی په اخور کې را لوی شوی دی او پښتانه حکمرانانو ته سپکاوی کوي، د دوی ټوله ډله داسې وه، د دوی مشران تعصب او عناد دومره ړانده کړي و چې هېڅ یې نه لیدل مګر له هرې ممکنه لارې یې د پښتنو د ځپلو لپاره کار اخیسته.شیوای شرق و که ضیا مسعود و، احمد ولي مسعود و، که احمد مسعود و، که بسم الله خان و، که قانوني خان و، که عطاء خان و دوی ټولو د افغان له ټرمینالوژۍ سره دښمني کړې حتی د افغان نوم یې جعلي هویت بللی او ویل به یې موږ دا تحمیلي هویت نه غواړو. د خپلو بادارانو په لمسون یې د تذکرو ملي پروسه کې خنډونه ایجاد کړل، پلمه یې دا وه چې قوم باید په کې اضافه شي چې کله قوم په کې ولیکل شو بیا یې وویل چې د افغان کلمه دې تر حذف شي افغان یعنې پښتون.دوی د خراسان دعوه کوي مګر خراسان نه شي راجوړولی. څه موده وړاندې د کابل پوهنتون استاد جلال چې د بدخشان ولایت اوسیدونکی تاجک دی، خراسانیانو ته وویل چې ورورنو منډې مه کوﺉ په زمکه د خراسان جغرافیه نشئ رامنځ ته کولی د خراسان حدودات له بخارا واخله تر مشهده او له مشهد واخله ماورانهره پورې او له هغه ځایه واخله د سِند تر سیند یعنیې اباسینه پورې د خراسان جغرافیه وه ایا ازبکستان دې ته حاضر دی چې تاسو ته بخارا در وبښي؟ ایا ایران له مشهد درته تیریږي؟ پاکستان به درته تر اباسین پورې جغرافیه درکړي؟د استاد فیض الله جلال په خبرو کې هغه دروند حقیقت پروت و چې دغو یې ځواب ورنشو کړای، یوه درنه چوپتیا یې حاکمه کړه.دا د جبر کرښه په زور انګریزانو نیولې، یوه ورځ به د مقبوضه افغانستان ټولې سیمې د افغان حکومت برخه ګرځي، د سیمې هیوادونه دلته د جګړو تداوم همدې لپاره غواړي چې موږ دې ته وخت پېدا نکړو ترڅو د خپلې خاورې داعیه د مذاکرې پر میز کیږدو. جګړه، قومي تعصب، ژبني مسایل او مذهبي توپیرونه هغه نیرنګي نقطې دي چې موږ مصروف ساتي او له لویو مسایلو زموږ مخ اړوي.او د دې نیرنګي نقطو د سترنج دانې د شیوای شرق په څېر استخباراتي خلک دي.شیوای شرق او پدرام یا نور نومونه چې پورته یاد شول د سیمې د هیوادونو د لاس آلې دي، دوی د خپلو هدفونو لپاره د کاغذ تشناب غوندې کاروي او بیا یې ځای ډېران وي.دوی به د خراسان خوب او پښتانه د سلمیان غرونو ته د شړلو خوب په کولاب، مشهد او کوم بل هیواد کې د سیند اوبو ته تیر کړي. دا وطن د افغانانو کور دی دغه منفورې څېرې د تاجک قوم استازي نه دي، بلکې هغوی استفراق کړي دا قومي دلالان دي، دغسې څېرې هر قوم کې شته چې د هغه قوم استازولي نشي کولی، هر قوم په هر وخت کې هر قومي دلال او د بېګانه استخباراتو کړۍ رټلی او ویلي یې دي چې د سپي په خولې د سیند اوبه نه مرداریږي.د افغان ارمانجن نسل به د ترقۍ او ورورلۍ په طرف خپل منزل لنډ کړي په دې کاروان پسې به ځای ځای سپي غاپي مګر زموږ یون نشي درولی.