عباس ستانکزی: ډیورنډ په هیڅ صورت په رسمي کرښه نه منو

د ډیورنډ فرضي کرښې په اړه د افغان حکومت د یو شمېر چارواکو د څرګندونو په دوام دا ځل د بهرنیو چارو وزارت سیاسي مرستیال مولوي شیرمحمد عباس ستانکزي څرګندونې کړیدي او وایي چې ډیورنډ یواځې او یواځې یوه فرضي کرښه ده.د بهرنیو چارو وزارت سیاسي مرستیال دغه څرګندونې د پنج شنبې ورځ په لوګر ولایت کې له افغانستان څخه د شوروي سرو لښکرو د وتلو(د سلواغې۲۶مې) به مناسبت جوړې شوې غونډه کې وکړې.ښاغلي ستانکزي وویل: ” د ډیورنډ فرضي کرښه په هیڅ صورت د رسمي کرښې په حیث نه منو او پخوا هم هیڅ افغان دغه فرضي کرښه د رسمي کرښې په حیث نه ده منلې”نوموړی دغه څرګندونې په داسې حال کې کوي، چې څه موده وړاندې د قومونو، قبایلو او سرحدونو چارو وزارت سرپرست مولوي نورالله نوري له طورخم څخه د لیدنې پرمهال ویلي و، چې افغانستان له پاکستان سره هیڅ رسمي سرحد نه لري.بلخوا د پاکستان موقت لومړي وزیر انورالحق کاکړ څه موده وړاندې له طلوع نیوز سره په ځانګړې مرکه کې د ډیورنډ فرضي کرښې ته د رسمي نړۍوالۍ کرښې خطاب کړی و، چې د نوموړي دغه څرګندونې د افغانانو د سختو نیوکو سره مخ شوې.ډیورنډ د انګریزانو لخوا په افغانانو باندې تپل شوې کرښه ده، چې هیڅ افغان ته د منلو وړ نه ده او تر دې مهاله په افغانستان کې د هیڅ یو نظام چارواکي د رسمي کرښې خطاب ورته نه دی کړی.د دغې کرښې په اړه تل افغانانو غږ پورته کړیدی او له نړۍوالو یې غوښتې دي، چې یاده کرښه نوره منحل کړي او هغه قوم، چې په دوو برخو وېشل شویدی، بیرته سره یو ځای کړي.