نن د حکومت د اطلاعاتو او رسنیو په مرکز کې د حکومتي ادارو د یو کلنو لاستهراوړنو تشرېح پروگرام کې د عدلیې وزارت په خپلو لاستهراوړنو راپور له رسنیو سره شریک کړ.
د یاد وزارت مسوولینو وویل، دغه وزارت د اسلامي امارت په بیا واکمنېدو سره، د اداري فساد له منځه وړلو، تقنیني سندونو د تسوید او تدقیق، له امارتي شتمنیو څخه د دفاع، د جواز لیکونو د ورکړې او تمدید او حقوقي خدمتونو وړاندې کولو برخه کې مهم گامونه اوچت کړي دي.: «په تېر کال کې ۱۰۱ عنوانه تقنیني سندونه تسوید شوي، چې له دې جملې د ۹۵ سندونو فقهي تخریج تر سره شوی، امارتي ادارو ته ۱۸۴ حقوقي او قانوني مشورې ورکړل شوي، د ۵۹ هوکړه لیکونو په اړه نظر ور کړل شوی، ۵۰ کړنلارې، مقررې او د مشرتابه فرمانونه تسوید او تدقیق شوي او په ټولیز ډول ۱۹۸ تنه د تقنیني او وکالت ستاژ له پروگرام څخه فارغ شوي دي.»
د عدلیې وزارت مسوولینو وویل، له حکومتي شتمنیو د ساتنې، د ځمکو غصب مخنیوي او املاکي شخړو د حل په موخه؛ د منقولو او غیر منقولو شتمنیو او ملکیت له ۷۹۲۸ قضیوو، ۲۳ حوېلیو، ۲۵ دُکانونو، ۲ لوړپوړیزو ودانیو، ۲ سرایونو او یوه کلینیک څخه دفاع شوې، په اداري او تجارتي برخه کې د څه باندې ۱ مېلیارد او ۲۷ مېلیونه افغانیو له جملې څخه، څه باندې ۱ مېلیارد او ۱۶ مېلیونه افغانۍ د محکمو د قطعي پرېکړې په اساس د دولت خزانې ته تسلیم شوي، څه باندې ۱۰ مېلیونه او ۵۰۰ زره افغانۍ د امارت په گټه فیصله شوي، دغه راز څه باندې ۲۳۴ زره امریکایي ډالر هم د محکمو د پرېکړې له مخې د دولت خزانې ته سپارل شوي دي.: «په وروستي یوه کال کې د معاملاتو لارښوونې دفترونو ۳۶۷۲ او د اتحادیو او خیریه بنسټونو ۲۲۰ جواز لیکونه نوي شوي، د ۴۰۱ ټولنو، اتحادیو، خیریه بنسټونو او ۵۳۲۲ معاملاتو لارښوونې له دفترونو څخه څارنه شوې ده. همدا راز په تېر یوه کال کې څه باندې ۱۱۰ زره تنو ته حقوقي پوهاوی ورکړل شوی، ۱۹۰۰ تنو سره په حقوقي برخه کې مرسته شوې، ۱۸۳۰ تنو ته حقوقي مشورې ورکړل شوي او ۵۷۷ تنه شکمنو کسانو د محکمې د حکم په اساس برائت حاصل کړی دی.»
د یاد وزارت مسوولینو د خپلو لاستهراوړنو په اړه وویل، تېر یوه کال کې د مدافع وکیلانو ۱۵۹۰ جواز لیکونه نوي شوي، مدافع وکیلانو ته ۴۲۷۵ جزایي، معلوماتي او د مالیاتي بېلانس فورمې وېشل شوي، له مدافع وکیلانو او موکلینو څخه د شکایت ۲۶۰ عریضو ته رسېدنه شوې او له ۷۷۴ دار الوکالو څخه څارنه شوې ده.
له تېرې اوونۍ راهیسې د حکومت د اطلاعاتو او رسنیو په مرکز کې د حکومتي ادارو د یو کلنو لاستهراوړنو تشرېح پروگرام پیل شوی، چې نن پکې د عدلیې وزارت د خپلو لاستهراوړنو په اړه د رسنیو پر وړاندې خپل معلومات شریک کړل.