د عدلیې وزارت وايي، د کابل په پغمان ولسوالۍ کې د سردار محمد داودخان ښارگوټی د اختصاصي محکمې د پرېکړې پر بنسټ امارتي ثابت شوی دی.
له عدلې وزارت څخه په خپره شوې خبرپاڼه کې ویل شوي، د امارتي غصب شوو ځمکو قضیو ته د رسېدنې اختصاصي محکمې د پغمان ولسوالۍ په قرابل کلي کې چې د سردار محمد داود خان په نوم یادېږې، پر ۵۵۶ جریبه ځمکه باندې د ځمکو له غصب څخه د مخنیوي کمېسیون د دعوې په بررسۍ سره یاده شوې ټوله ځمکه امارتي تثبیت کړه او د ځمکو له غصب څخه د مخنیوي او د غصب شوو ځمکو د استرداد کمېسیون ته یې وسپارله.
د ځمکو له غصب څخه د مخنیوي کمېسیون د یادې ساحې په بررسۍ سره، موضوع د شرعي او قانوني پرېکړې لپاره اختصاصي محکمې ته استولې وه چې یادې محکمې د موجودو سندونو، دلایلو او شواهدو په دقیق او هر اړخیزې بررسۍ سره، یاد شوی ټول ښارگوټی امارتي تثبیت کړ.
د خبرپاڼې له مخې، یاده شوې ځمکه بلندآبه او تپهزاره ده او د دغې قضیې مدعی علیه د محکمې په لړ کې داسې سندونه او مدارک وړاندې نهشو کړی چې ثابته کړي دا ځمکه د افرادو شخصي ملکیت ده؛ ځکه چې په وړاندې شوو ځینو سندونو کې جعل او تزویر شوی وو. د دې پر وړاندې سندونه، املاکي دفترونه او د ځمکې د تصفیې سندونه د یادې ځمکې امارتي توب په ډاگه کوي چې په همدې دلیل یاده ځمکه د ځمکو له غصب څخه د مخنیوي کمېسیون ته وسپارل شوه.
د امارتي ځمکو له غصب څخه مخنیوی او د غصب شوو ځمکو استرداد د افغانستان اسلامي امارت له اساسي موخو څخه ده چې د ځمکو له غصب څخه د مخنیوي او د غصب شوو ځمکو د استرداد کمېسیون په همدې منظور رامنځته شوی دی. دا کمېسیون مسوولیت لري ترڅو امارتي (سلطاني)، عامه مرعی او وقفي غصب شوې ځمکې له غاصبینو او زورواکو او غیر شرعي ذوالید څخه استرداد کړي او دا بهیر د افغانستان په ټولو ولایتونو کې په چټکۍ سره دوام لري.
په خبرپاڼه کې ویل شوي، د ځمکو له غصب څخه د مخنیوي کمېسیون خپل ترڅنگ د هېواد په څلورو زونونو کې څلور اختصاصي محکمې لري او په هر ولایت کې د غصب شوو ځمکو د تشخیص او تثبیت یو تخنیکي هیئت لري چې دغو موخو ته د رسیدو لپاره کار کوي.