د ایران د بهرنیو چارو وزیر سید عباس عراقچي ویلي، چې ایران له افغان چارواکو سره په ګډه له ایران څخه د افغان کډوالو د ویستلو طرحه ترتیب شوې. د نوموړي په وینا، د افغان کډوالو د بیرته ستنولو لړۍ به تدريجي او په باعزته ډول ترسره شي.
نوموړي زیاته کړې کابل ته د خپل وروستي سفر په ترڅ کې یې د افغان حکومت له چارواکو سره د کډوالو بیرته ستنولو په اړه خبرې کړې دي او دواړو لوریو د غیر قانوني کډوالو په بیرته ستنولو ټینګار کړی.
عباس عراقچي وړاندې ویلي چې ایران له افغان حکومت سره په خبرو بوخت دی تر څو دا پروسه اصولي او په منظم ډول ترسره شي. نوموړي دا هم ویلي چې افغان لوری باید د بېرته ستنېدونکو کډوالو د جذب وړتیا ولري، چې دا مهال افغان چارواکي د دې چارې د پلي کولو لپاره پر پلان جوړونې بوخت دي.
یاده دې وي چې، ایران د افغان کډوالو د ستنولو لپاره د تدریجي ستنولو موضوع داسې مهال مطرح کړې چې، پاکستان هممهاله د یوه ګاونډي هېواد په توګه د دغې تګلارې خلاف عمل کړی دی.