غزني کې د اوبو ۳ کوچني بندونه جوړ او گټې اخیستنې ته وسپارل شول

د غزني ځايي مسوولین وايي، د غزني ښار د جباروالو سیمې په گډون د دغه ولایت د اندړو ولسوالۍ په خرخشې او احمدي سیمو کې د اوبو ۳ کوچني بندونه جوړ او گټې اخیستنې ته وسپارل شول.د غزني د کرنې، اوبو لگولو او مالدارۍ رئیس محمد ادریس حنیف وايي، د اوبو یاد کوچني بندونه د ناروې کمېټې په مالي ملاتړ جوړ شوي، چې هر یو بند یې د ۱۱ زره متره مکعب اوبو ذخیره کولو وړتیا لري.:« د اوبو دغه کوچني بندونه د ۶.۵ مېلیونه افغانیو په لگښت جوړ شوي. د یادو کوچنیو بندونو په جوړېدو سره به د سیمې د سېلابونو اوبه ذخیره شي، چې په مټ به یې سلگونه جریبه ځمکې خړوبې او د کرنې وړ وگرځي.»د غزني والي محمد امین عمري د یادو بندونو د پرانیستې په مراسمو کې وویل، د اسلامي امارت د حاکمیت وروسته تر دې مهاله په غزنې کې د اوبو د مهار په موخه د اسلامي امارت، نړیوالو موسسو او عامو خلکو له لوري لسگونه واړه بندونه جوړ شوي او په نورو بندونو هم کار روان دی.: «د افغانستان اسلامي امارت د اوبو مهارت ته ژمن دی او همدا اوس هم د دغه ولایت په هره ولسوالۍ کې د اوبو او انرژي وزارت له لوري یو، یو کوچنی بند جوړېږي.»د اوبو او انرژۍ وزارت وايي، په پام کې لري چې د هېواد په گوټ گوټ کې واړه د اوبو بندونه جوړ کړي، چې هم خلکو ته د کرنې اوبه برابرې کړې او ورسره د ځمکې لاندې اوبه هم تغذیه کړي.په سږني ژمي کې د نورو کلونو په پرتله سږ کال ورښتونه او واورې بېخي کمې وورېدې، چې له امله یې یو ځل بیا د سختې وچکالۍ خبرداری ورکول کېږي.