د افغانستان د مخابراتو او معلوماتي ټکنالوژۍ وزارت وايي، په فراه کې له مرکز فراه څخه بیا تر فراه رود ولسوالۍ تر دوراهي سیمې پورې د نوري فایبر ۷۴ کیلومتره پروژه بشپړه او گټه اخیستنې ته وسپارل شوه.
له یاد وزارت څخه په خپره شوې خبرپاڼه کې ویل شوي، په دغه نوري کیبل ۲۶مېلیونه افغانۍ لگښت راغلی.:«د نوري فایبر یاده پروژه د مخابراتو او معلوماتي ټکنالوژۍ وزارت په لارښوونه او د ولایتي ریاست او اړونده شرکت په مرسته د ۸ میاشتو په موده کې بشپړه او گټې اخیستنې ته وسپارل شوه چې د فراه مرکز سربېره به اته ناحیې له دې کیبل سره ونښلول شي او نږدې راتلونکي به یې مزي ټولو ولسوالیو پورې وغځول شي.»
په خبرپاڼه کې ویل شوي، فراه د هېواد ۲۶م ولایت شو چې د نوري فایبر کیبل سره نښلول کېږي.د هېواد په ځینو ولایتونو کې هم لا گڼې ادارې د نوري کیبل سره نښلول شوي نه دي. د مخابراتو او معلوماتي ټکنالوژۍ وزارت وايي، ډېر ژر به د هېواد ټولې دولتي ادارې له نوري کیبل سره ونښلول شي.