لومړۍ برخه
هره ډله او ټولنه د ځان لپاره ټاکلې تګلاره او مشخص لید لوری لري او د یو لړ خپللیکل شویو اصولو او قوانینو په رڼا کې پر مخ ځي.
د دوی موخه له شخصي او انحصاري اهدافو سره د لوړو ارمانونو پوره کول دي، چې په پایله کې د هغې غورځنګ د پیلکوونکو نوم او نښان پاتې شي.
په دې منځ کې، هر حرکت نېک نه دی او هره ډله د سپینو او پاکو موخو په اساس نه جوړېږي، بلکې ځینې کسان له همدې فرصتونو او د ټولنې له خالي ذهنونو او تیار چاپیریال څخه ناوړه ګټه اخلي او په داسې کړنو لاس پوري کوي چې پایله یې عمومي زیان او شخصي ګټه وي.
دغه ډول ډلې د خپلو هدفمندو خودنوشته اساساتو پر بنسټ د ناخبره او نابالغو کسانو ذهنونه غولوي او د حق او باطل په ګډولو او خپلو ناسمو موخو ته د رسېدلو لپاره د خپلو پلویانو په سترګو کې په ښه رنګ ورکولو سره ورو او کمزوري ګامونه اخلي.
له همدې امله، اړینه ده چې له دغه ډول کسانو او ډلو سره مقابله وشي او د دوی د خپلسري کړنو او ستونزو جوړولو مخه ونیول شي.
په همدې خاطر، له دغه ډول کسانو او ډلو سره د چلند او مقابلې لارې او طریقې چې د ځان لپاره یې غونډې جوړې کړې دي، یوې مشخصې پالیسۍ او قاطع او سنجول شوي غبرګون ته سخته اړتیا لري، چې یوازې درد دوا کړي، خو نورو غړو ته زیان ونه رسوي او ټولنه له بدبختۍ سره مخ نه کړي.
له همدې امله، د دې یادښتونو د سلسلې تمرکز له بغاوت کوونکو سره د سالمې او خوندي مقابلې د لارو او طریقو په لټون او لیست کولو دی، چې یواځې دوی بې اغېزې کړي او ټولنه د دوی له ګواښ څخه خوندي وساتي.
دا چې له دوی سره څنګه مقابله وشي، چې هم ځانونه د ناسنجول شویو او احساساتي کړنو له زیانونو او پایلو څخه خوندي وساتو او هم د ټولنې بې ګناه او عادي کسان له تاوتریخوالي څخه لرې وساتل شي، تر ټولو مهمه موخه ده.
ځکه چې هوښیار انسان په هره شخړه کې هم پر مقابل لوري د ګوزار کولو او هم د مقابل لوري له ګوزار څخه د ځان ساتلو په لټه کې وي.
نو هڅه به وکړو چې په دې ليکنو کې داسې لارې او طریقې معرفي کړو، چې له بغاوت کوونکو سره د مقابلې او مبارزې لپاره تر ټولو مناسبې، خوندي او اغېزمنې لارې وي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.