هندوکشغږ ته د رسېدلو معلوماتو پر بنسټ، د امریکا د سولې نړۍوال (غیر انتفاعي) انستیتیوت (United States Institute of Peace) ټیټ رتبه هیئت په دې وروستیو کې د مقاومت شوری له یو لوړ رتبه هیئت سره لیدلي دي؛ د امریکا د سولې نړۍوال انستیتیوت په استازیتوب د دغه بنیاد دوه غړو ميرمن کمبرلي او افغاني الأصله امريکايي سيد عزيزالله سادات هاشمي، چې د دغه انستیتیوت په رهبرۍ کې کومه خاصه ونډه نه لري، د مقاومت شوری د تصمیم نیونې په کچه هیئت سره لیدنه کړې ده.
د هندوکشغږ د معلوماتو پر اساس، په یاده لیدنه کې د مقاومت شوری په استازیتوب عبدالرشید دوستم، محقق او الماس زاهد ګډون کړی و. ظاهراً مقاومت شوری انګېرله چې دغه ناسته به د دوی لپاره مهمه لاسته راوړنه او پرمختګ وي، خو د سولې نړۍوال انستیتوت په استازیتوب خورا ټیټ رتبه هیئت ورسره لیدلي وو؛ د چارو شنونکي د هیئت په لحاظ دا غیر متوازنه لیدنه په مقاومت شوری تمسخر او د هغوی توهین ګڼي.
د امريکا د سولې انستیتوت يو غير دولتي سازمان دی، چې ډیر تمرکز يې پر ټولنيز پيوستون او پرمختګونو وي، د منازعاتو په حل او د سولې په مسائلو کې ډير کم دخالت لري، د امریکا پر بهرني سیاست یې تأثیر هیڅ دی، ځکه تنها په ځینو محدودو برخو کې پروژهيي فعالیت لري او تر ډیره بریده د روایاتو پر جوړولو کار کوي.
د مقاومت په نوم شوری چې له هېواد بهر د پخوانیو سیاسیونو یوه مجموعه ده، د تېرو شاوخوا دریو کلونو راهیسې یې هڅې کړي، چې له بېلابیلو هېوادونو، سازمانونو، قاچاقبرانو، وسلو له کمپنیو او نیابتي ډلو له ډونرانو په افغانستان کې د جګړې د پیل لپاره ملاتړ ترلاسه کړي، خو له ټولو هڅو سره سره تر دې مهاله نه دي توانېدلي چې مؤثر ملاتړ ترلاسه کړي.