د پاکستاني پوځ له لوري پر افغان خاوره یرغل او ځوابي برید په بهر کې مېشتې د افغانستان اڼترنېشنل، آمو، زاویه نیوز او اطلاعات روز په څېر پردیپالو رسنیو او دښمن پلوه خبریالانو له مخه نقاب لېرې کړ او د دوی ټولې هغه ادعاوې یې دروغ ثابت کړې چې ځانونه یې بې طرفه او د افغانستان ملي ګټو ته ژمن بلل. دا رسنۍ چې د غرب او نورو هېوادونو مالي ملاتړ فعالیت کوي، له پاکستاني پوځ سره د افغانستان په جګړه کې یې د پاکستان لوری نیولی او د دوی په ګټه او د افغانستان په ضد خپرونې کوي.
دا رسنۍ او د دوی اړوندې ټولنیزې پاڼې، په منظمه توګه د پاکستان د پوځ او رسنیو له لوري خپرېدونکي دروغجن تبلیغات خپروي او د جګړې په ډګر کې یې د افغان پوځ پر بریاوو او لاسته راوړنو سترګې پټې کړې دي.
د دې رسنیو مسؤلین له اوږدې مودې راهیسې پاکستان او نورو هېوادونو ته سفرونه کوي او له دوی څخه د پیسو اخیستلو په بدل کې د افغانستان ضد نشرات او خپرونې کوي. پاکستان په اسلام آباد کې له دې ډلې ځينو رسنیو ته دفترونه هم ورکړي دي.
د دې رسنیو مسؤلین اکثریت هغه افراد دي چې د افغانستان د اشغال پر مهال یې په کابل کې له مېشتو غربي سفارتونو پیسې ترلاسه کولې، بیا به یې د هغوی په خوښه د افغانستان د خلکو او ارزښتونو خلاف نشرات کول؛ دوی هغه مهال هم د اشغال په ګټه او یو طرفه خپرونې کولې.
د مخالفو رسنیو دا مسؤلین چې د جمهوریت له پرځېدو وروسته غرب ته وتښتېدل، هلته یې د بهرنیو استخباراتو په ملاتړ د رسنیو په نوم تبلیغاتي مرکزونه جوړ کړي او له هغه راهیسې په منظمه توګه د افغانستان د خلکو او ارزښتونو په ضد نشرات کوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.