د تسنيم خبري اژانس د راپور له مخې، د مالديف ولسمشر محمد مويزو پرون سه شنبه د دغه هېواد د پارلمان له لوري تصويب شوی هغه قانون تائيد کړ، چې له مخې به یې تر دې وروسته د اسرائيلي پاسپورټ درلودونکي وګړي دغه هېواد ته د داخلېدو اجازه ونه لري.
د سرچينې په خبره، د مالديف د ولسمشرۍ ماڼۍ په اعلاميه کې راغلي چې دغه اقدام یې غزه کې د اسرائیلي رژيم د وحشتونو په غبرګون او له فلسطیني ولس سره د خواخوږۍ او يوځای والي په موخه کړی دی.
مالديف يو کوچنی اسلامي هېواد دی چې د خپلو زړه راښکونکو سيمو د ليدلو په موخه ورته ګڼ شمېر بهرني سيلانيان راځي او د رسمي شمېرو له مخې تېر کال دغه هېواد ته د نږدې ۱۱ زره اسرائيلي وګړو تګ ثبت شوی وو.